Inn Biaktheng Hme Kong

#Kan hnu i a peh>>>>

Bible hlun chan ah Pathian pekmi nawlbia lungtlap kha biakam kuang chungah an chiah i an kalnak hmun kipah an put zungzal nak kong le khuaruahhar nak kong kha Exo 40:36-38 ah, “Israel mi kha riah hmun pakhat in pakhat ah an i `hial tikah Pathian umnak thlam cung i minmei kha aa `thial lawnglawng ah an i `thial tawn. Min-mei kha a `thial lo ahcun annih zong riahhmun dang ahkhan an i `thial ve lo, Pathian hmelchunhnak minmei cu chun ah Pathian umnak thlam cungah a um i zan ah minmei chungah khan mei-alh in a um,” ti kan hmuh. Nambar 10:33-34 zongah, “Annih an rak putmi biakam kuang nih cun Israel mi hna caah i dinhnak hmun a kawlpiak hna i an hmaiah a kal, cun Bawipa minmei cu an riahhmun in an i thawh fate chun ah annih cungah a um,” ti kan hmuh.

Culeng ah Vawleicung dihlak a uktu Pathian biakam kuang cu Jordan tiva kha a tan lai caah mi vialte cu Jordan tiva ral an phak hlantiang Pathian biakam kuang a putu tlangbawi pawl cu tiva lai vawlei kha fek tein an lamh i Israel mi vialte hna cu leiro cung in Jordan tiva kha an tan (Joshua 3:11,17) ti kan hmuh. Cu hnu ah tlangbawi pasarih nih biakam kuang put buin tuukawngki muko an tum i niruk chung Jeriko khua kha an veel, Pathian biakam kuang cu an hnu in an zulh hna, khua kha nikhat an veel dih cangka biakam kuang cu thlam chungah a lut`han i zankhat a riak, nisarihnak ah muko tum thawng an theih in mi vialte cu thangpi in an au tikah ralhau cu an tluk dih caah biakam kuang thawngin Jeriko khua cu an lakkhawh ti kan theih, (Joshua 6:4-5,8,11,20). Hi Bible nih Pathian cu biakam kuangin a mi hna he a umnak kong a langhter.

Cu bangin Biakamthar chan ah Jesuh Khrih hrimhrim cu biakamnak thar a si i mi vialte an sualnak in a tlanh i Catholic hna cu Jesuh a hnubik zanriah ei`inak in a rak sermi, zungzal nunnak a pemi, Bawipa Thisa changreu thiang kha thlam fate chungah an chiah hnuah, a thianghlim mi puanthan in a si ah, aa dawhmi pangpar hna in a si ah, aa dawhkhawh chung aa dawh in an `tamhnak cu a si. Sullam ngeilo in an tuahmi a si lo. Phaisa kha a lak in pangpar hna, aa dawhnak menmen ah an soksam mi a si lo. Bible kha a hmaan ningin an zulhmi a si. Bible hlun chan ah biakam kuang hlun thawngin Israel mi hna cu Jeriko khua an ral hna kha an rak tei i khuaihliti le cawhnuk a luannak “Kanaan ram” kha an rak hmuh. Biakam thar ah Jesuh Khrih nih Vawlei khuachia satan ral kha a tei i a zungzal vancung pennak kha a pek `than. Cu Khrih i, “Nunnak changreu kha upat bu tein an biak i khuapi chungkhuate chungah put in a vahpi mi Catholic nih khuachia satan ral an tei i zungzal nuamhnak vancung ram an conak a si. Cuticun a biapi mi Bawipa Thisa changreu kha an biak taktak. A ruang cu Khrih cu, cu changreu in kannih he a um taktak ti an zumh caah a si.

Cucaah biak`theng cungah mei an van. Pathian biakcaan paoh ah cunglei i Bible caang kha a zulh i a sikhawh chung in a tuah. Catholic zulhphung hna cu Bible in a pial tiah soisel in sual a phawmi hawikom cheukhat sinah biahal kan duh hna. Biak`theng mei vang hlah, mei van a hau lo, tiah a tinak Bible a um maw? A um ahcun ka sawhpiak uh. A um lo ahcun zeicah Biakinn ah mei nan van kun lo? Nannih nih Bible lawnglawng zulh a herh tiin Catholic pawl a soisel tawnmi nan si. Cuti a si ahcun cunglei i Bible hna kha zeicah nan zulh nan tuah kun lo? Ngaite tiah cun Bible lawnglawng, Khrihfa pakhat cu Bible i aa telmi lawng tuahawk a si, tiah hmurka in au loin Bible chung taktak a zultu hna cu Catholic lawng an si kha a fiang ko lo maw? Catholic pawl nih zeicah aa dawhtuk le a thiangmi “Biak`heng” asiloah a hme mi “Biak`heng (thlam)” inn kip ah an ser cio kan ti ahcun Bible hlun i Moses kha Pathian nih biakam kuang ser ding a fialmi bia bangin an zulh cio caah a si. Pathian nih, “Zihmui khangh nak caah anri thing in biak`theng pakhat na ser lai,” (Exo 30:1) tiah a ti.

Cucaah biak`theng hmete (or) phazaa sin an ser i phazawng-dan mei an van cio. Cuticun Catholic pawl nih an inn ah thing in siseh, rua in siseh biak`heng an ser. Cucu Pathian fialmi a si i a tung donghnih a vang dongkhat tungvang palh a si lai i dong-hnih a sang lai (Exo 30:2) tiah kan hmuh. Cuticun Catholic pawl nih a ngantuk lo, a hmetuk zong asilo mi, mah duhmi pungsan in biak`theng an i ser cio. Bible ahcun a cung le a vampang le a ki fong hna sui in na hut lai, a cung velchum kha suihri in na menh lai tiin a `amhmawih ter hna (Exo 30:3). Cu bangin an biak`heng kha puanthan rang le pangpar hna in an `amh. Bible nih, “Aaron nih mei-inn kha a zohkhenh hna tikah hi biak`theng cungah hin zingfa tein zihmui a khangh lai (Exo 30:7) a ti bang khan Catholic hna nih zing an thawh fate biak`heng ah phazawngdan mei an van, a ti kho deuh nih rimhmui an khutter. #Kan pehthan telai >>>