RC BUPI HRUAITU PETER LE A CHANGCHANG POPE HNA

Photo Credit

                Jesuh Khrih cu Pathian ngeihchun Fapa- Pathian a sinak kong kha kan theih fian cang.  Jesuh Khrih minung sinak a lak i Vawlei cung a um lio ah a zultu (12) a thim hna i Jerusalem khua le Galilee, Judea ram le Samaria ram khua hna ah a rak vah pi hna. Zultu hleihnih hna lakah lubik Peter kha Vancung Pennak hunnak tawhfung cu kan pek lai i Vawleicung i na hrenhmi cu Vancung zongah hrenh a si lai i Vawleicung i na awnhmi cu Vancung zongah awnh a si lai, tiah a ti. (Mt;16:19). Cun Jesuh Khrih a thawhthan hnu Tiberias Rili i zultu Pasarih sinah a langh lio ah, Zanriah an ei dih hnu ah Bawi Jesuh nih Simon Peter cu a thawh i, “Johan fapa Simon, hi hna nakin na ka daw deuh maw?” tiah voithum tiang a hal i “ka tuufa tete kha cawm hna” tiah voithum tiang bia a tiam tak. (Jn; 21:1-19) Zultu hleikhat hna sinah a langh lio ah, “Vawleicung khuazakip ah va kal u law miphun kip kha thawngtha va chim hna u,” a ti hna; (Marka; 16:14-17). Cun a zultu hleikhat hna kha, “Kan fialmi vialte hna hi an zulh nakhnga va cawnpiak hna u. Cun hihi philh hlah uh; nan sinah a zungzal in, caan dongh tiangin ka um lai,” tiah a ti hna. (Matthai; 28:16-20)

                Jesuh Vancung a kai hnu ah lamkaltu hna cu Oliv Tlang khan Jerusalem khua ah an kir i an rak umnak khaan chungah khan an kal. Thlacam awkah atu le atu abu tein an i pum i an sin ahcun nu hna le Jesuh nu Mary le Jesuh nau le kha an um ve. (Lam; 1:12-14) Pentecos ni kha a phak tikah zumtu vialte cu hmunkhat ah an i pum i thla an cam. Chitkhatte ah khin Van in aw pakhat a rung; thlitu fakpi in a hrangmi thawng bantukin khan an thutnak inn kha a khat dih. Cun meizik he aa lo mi leite a hungchuak i an dihlak pakhat cio ah an i fu. Cu tikah Thiang Thlarau in an khat i holh dang in an holh; nain an holh cio in an theih. (Lam; 2:1-12) Cucu ram kipin a ra mi vialte an khuaruah a har dih. Midang nih cun “Hi hna hi zu an ri” tiah an ti hna. Cutikah Peter cu lamkaltu hleikhat hna he khan a hung dir i aw thangpi in phung a chimh hna. Mitampi nih khan a bia cu an zumh i tipil kha an in. cu ni i tipil a ingmi hna cu thongthum (3000) tluk an si.

                Cu ni thawkin zultu hleikhat hna cu (Judas Iskariot ai ah Matthias an thim cang) Vawleicung khuazakip kal in phungchim hram an thawk. Hi ni ah Jesuh Nu Mary aa tel ve. Hruaitu lubik cu Peter a si. Cu ni in Catholic Bupi cu aa thawk. Cucaah lubik Peter cu hmasabik Catholic Lubik Pope a si. Pope Peter cu Rome khua ah hmunpi a lak. Cu hnu ah zumtu cu khuazakip ah an karh chin lengmang. Khuazakip zumtu hna cu Catholic ti a si i Rome khua in a thawk caah Roman Catholic tiin auhnak hi a si. (Jesuh Khrih cawnpiaknak kha a zumh i Lamkaltu he aa pehmi Bupi zumhnak a doh lomi poah cu Catholic an si dih. Pope Peter a thih tikah Pope St. Lixnus nih a chan. Cun pathumnak Pope cu St. Cletus a si i St. Clement cu palinak Pope a si. Cuticun Catholic Pope cu pakhat hnu pakhat an i chang lengmang i atu kan Pope thiang Francis hi (266) nak Pope a si.

Add new comment

2 + 2 =