Sahrang (666)

SAHRANG (666) SULLAM 

 Harper’s Bible Dictionary cahmai 99 ah kan zoh a si ahcun, Beasts = ṭihnung ngaimi sahrang hna, Bible nih a hmanning ahcun, Gen 1:24, innzuat saram a phunphun le ramlak saram a phunphun. Biathlam chung hmanning ahcun Bia 6:8 Ral in siseh, Mangtaam in siseh, Rai(Pul rai zawtnak ṭha lo) in siseh, sahrang in siseh, mi thah khawhnak nawl kha pek an si.

Minung lei in Titus 1:12 “ Milichim, saram bantuk, mithathu, mi-orkhu” tiah ti a si. Bia 13:1 i Rili sahrang cu Rome Empire, Bia 11:7 Dongh hngallo khur thuk chung i sahrang, Khrih a dotu ti in kan hmuh. Cu lawng a si rih lo Harper’s Dictionary cahmai 32 nak kan zoh ahcun, Khrih a ralchantu, 1Jn2:18-29, 4:1-6, IIJn 1:7-11, IIThess2:8, IICor6:15, Bia 20:8 hna zong hi a kan hmuh sak.

Cun 1964 kum U Saw U lehmi Bible readings cauk chung cahmai 144 ahcun Sahrang cu Pope Aannaa (nawlngeihnak) a si, Pathian nih ulhawk a timi ni ulh lo in Zarhpini ah a ṭhial caah , hihi Pathian doh a si tiah a ti. A dang cauk, The New Jerome Biblical commentary, cahmai 1009 No.44 chung ahcun, Rili sahrang hi Bia13:1 Raltuknak le i ṭhenṭhek dihnak, Bia 13:1-10 kha 11:7 le Daniel angan 7 he khan aa khat. Cun sahrang timi cu Nero sianggpahrang, Khrihfa a thaṭu, Khrih a ralchantu a ti.

Vawlei siangpahrang cu, Bia 13:11-18 kha Daniel8:3 he aa khat. Cun Bia 16:13, 19:20, 20:10 chung i sahrang a timi na kha Nal profet a timi a si tiah kan hmuh. A   dang pakhat Maṭhew Henry’s Commentary cahmai 778 ahcun Bia13:11-18 hi (Great Impastor) midang min put in mihlen a thiam ngaimi, biaknak lei i zumh awktlak te i lawhter i mi thlarau a hlengtu, a si tiah kan hmuh.

Cun William Cobbeṭ ṭialmi Protestant Reformation in England and Ireland cauk cahmai 5,No.9 ah khan “ Kan hmet lio ahcun biakinn kip le cauk kip ah Biathlam chung i sahrang a timi cu Catholic Pope a si, Catholic Biakning cu  khuachia biak bantuk in an biak, an zumh ning cu fihnung a si, tiah an kan cawnpiak tawn”, tiah a ti.

Laimi caah, ṭihnung seh hmang a simi Cakei pawpi, pawlai, Vom, Rul, Cenghgia,tbk hi sahrang tiah kan ti. A si nain Bible chimmi sahrang le kan nih Laimi sahrang hi aa dang deuh in kan hmuh. A cung lei i Bible hrilhfiahnak kan zoh tikah khan tahchunhnak hna lawng in kan hmuh. A caan ah Nero siangpahrang a ti, a caan ah hlen thiam profet a ti. A caan ah raltuknak in i ṭhenṭhek dihnak a ti tikah khuaruah awkding tampi a um.

William Cobbet bia kha vun peh ṭhan u si law, “Catholic Pope cu sahrang an si, Pathian a do tu, an cawnpiakning fih a nungmi, khuachia biak in Pathian a bia mi tiah an kan cawnpiak lengmang” ti mi hi vun ruah tikah lungrawk ngai a si ko. Vawlei cungah hin hlan lio AD 300 ah hin Rome ah Pope a ṭhu rih lo. Sihmanhsehlaw AD 1200 hrawngah hin cun Vawlei kakip ah Catholic Khrifa an rak um liangluang cang. Jesuh Khrih kong a chim hmasabik tu le Pathian Thawngṭha a kan theihter tu hna hi a ho te ko dah an va si hnga? Nero siangpahrang chan lio i zumhnak ruangah thahnak a ingtu hna kha tah zei Khrihfabu pawl dah an si hnga?

Khrihfabu ruang i lutlai(hruaitu) pawl thahnak a ingmi pawl kha tah zei Khrihfabu lutlaitu pawl dah an si hnga? Sifak santlai lo a zohkhenhtu, sianginn ṭhaṭha a ser piaktu, sizung ṭhaṭha a ser piaktu, chimh khawh lomi ngakchia pawl a cawnpiak tu , phunglam zulh ding a sertu hna kha zei Khrihfabu dah an si hnga? A ngaite ti ahcun AD 1500 hlan ah khan Khrifabu dang a um lo vasikaw. Catholic Khrihfabu ti dah lo ah mah vialte rianṭha a ṭuantu hna le zumhnak ruangah thihnak tiang a ing ngammi pawl kha Catholic Khrihfa lawngte an si. Cu lengah Mithiang pawl vialte hi tah Khrihfabu dangah a tu tiang hmanh ah an um bal maw?  Mithiang dirhmun tiang a cawnpiak kho mi Khrihfabu tah an um bal maw? Mithiang dir hmun tiang a cawnpiak kho mi hi Catholic Khrihfabu lawng a si lo maw?

Reformation (Remhṭhannak) chan lio ah khan England le Ireland ah khan minung zeizat liangluang dah an thih? “Remhṭhanmi Khrihfabu tiah cun, Catholic Khrihfabu cawnpiakmi nak khan a ṭhat deuh awk a si hnga lo maw? A siah Catholic Khrihfabu cawnpiaknak nakin a ṭha deuhmi cawnpiaknak tah a um ti hnga lo maw? Khrihfa Remhṭhan kan ti i a rawh chinnak tu a si. I ṭhennak a chuah tertu le Khrihfabu i ṭhenṭhek dihnak tu a si” tiah a ti. ( William Cobbeṭ ṭial mi, Chapter 1 a tawinak in lakmi)

William Cobbett i a chimmi hi ruah awk ngai a si. Khrihfabu hi a hramthok tein vun zoh ahcun Peter kha Jesuh zumtu a si raungah thahnak a ing hmasa bik vasikaw, Peter chaangtu Pope pawl 25 hna hi zumhnak ruangah le Catholic Khrihfabu ruangah thahnak an ing timi hi a ho tal nih an chim bal lo maw? Pope an ṭhat loning le Catholic Khrihfabu cawnpiaknak a ṭhat lonak kong tah zeitindah na hngalh ning? England ram siangpahrang Henry 8nak le Martin Luther nih AD 1500 hnu i Pope ṭhat lonak le Catholic Khrihfabu an soinak hna ruangah, Catholic Pope cu sahrang a si tiah na ti ve men lai. Mah hna hi Catholic a do hmasabik pawl an si men lai.Protestant(Catholic dotu) chungin pa zeizat dah Bawi Khrih caah thihnak an in? Mithiang(Saint) tah pa zeizat, cawnpiakning tah a hmun maw? Cun Protestant Lutlai a nganbik, titehna hi tah Protestant Khrihfa tuanbia ah a um hnga maw? Peter a chaangtu hi tah Protestant in a ho dah an thim? A changchang in min cazin le an ṭuan kum tah a um maw? Khuazei hmanh ah na hmu lai lo. An um leh lo cu ta! Asiah, William Cobbett i chimmi, Catholic Pope cu sahrang an si tiah kan hmet lio ah an kan cawnpiak ti mi hi Bible umtu ning le Khrihfa tuanbia ningin kan zoh a si ahcun a ho deuh dah sahrang a si hnga? Ṭha tein vun ruat hmanh.

By: Saya Josehp Bawi Ngawt