SINING HMAANLO UMTUNING

Thlarau ttumnak

5. RILHNAK, `TAHNAK SINING HMAANLO UMTUNING HNA HE PEHTLAIHIN BIBLE CAWMPIAKNAK

Rilhnak, `tahnak, ngaihchiat `tahnak tiah sining hmaanlo khuaruahhar si canning hna, hngalhnak lungthin le cinkennak a lohtlaunak hna he pehtlaihin bible nih a cawnpiaknak kha biapiah chiahding asi. Khibantuk rilhnak le a rillio i a cangtawn mi `tahnak, ngaihchiat lungkuainak,  aukhuan phunzainak, mah i theihlonak, hngalhnak le thinlung a tlaunak, aunak, lawngvangh i tawinak, saram cheukhat awthang bantukin aunak (bianaah, rul bantuk lawnnak, utlak bang i hlawhnak phun) tiah khuaruahhar sicanning he pehpar in bible dirhkamhnak caah an ilak mi bible caang hna kan langhter sicun; 

Ezekiel 1:28-2:1
Ruahpi a sur tikah khuadawm lak i chuncha a chuah bantuk khin a velchum i a ceumi cu a um. Bawipa sunparnak a muisam cu cubantuk cu asi. Cubantuk biathlam ka hmuh tikah ka bawk. Cun a ka thawh i “mipa dirtuah, bia kan ruahlai” tiah a timi awthawng kha ka theih.

Daniel 10:7-9
    Keimah Daniel lawnglawng nih cu langhnak cu ka hmuh. A biathawng cu ka theih tikah vawlei ah ka tlu i mang canghlan in ka um i ka bawk.

Genesis 15:14
    Ni a tlak cuahmah tikah khan Abram cu mitkuh thawngai in aa hngilh i a cungah `ihnak nganpi a tlung.

Joshua 5:14
    Amah nih cun sihlah! Bawipa ralkap bu hruaitu sinakin ka ra, tiah a ti. Joshua cu vawlei ah a bawk i a biak i “Ka bawipa nih a salpa a fialmi cu zeidah asi” tiah ati. 
Bible cathar chung i bible caang cheukhat kha kan zohpeh asiahcun;
Matthai 17:6
    Azultu pawl nih aw kha an theih tikah an thin a phangtuk i vawlei ah an bawk.
Matthai 28:1-4
    Ralveng pawl cu an thin phangtuk hringhran i a therh hna i mithi bantukin an um.
Jn. 18:6    
    Amah cu keimah hi ka si tiah a ti hna tikah khan, hnulei ah an i tawn i vawlei ah an tlu.

 Lam 9:3-4 
    Damaskas khua a heifuh lio, khuapawng a phak ahkhin, chikhatte ah van in ceu pakhat nih a velchum in a run ceuh. Saul cu vawlei ah a tlu i aw pakhat nih “Saul, Saul zeicahdah na ka hrem: tiah a ti thawng kha a theih.
Biathlam 1:17    
    Amah cu ka hmuh tikah mithi bantukin a kehram ah ka tlu.
Lam. 2:1-4; 13;15-21 
    Pentecost ni ah a cangmi thil canning le St. Peter i phungchim fianternak
Lam. 10:44-46     
    Cornelius inn i St. Peter phungchim lio ah Thiang thlarau Pathian cu Pentecost ni bantukin a rak `tumnak

A cunglei i bible cacang hna kha zohchih fianter in an hman`heo. Hi bible caang hna pinah adang bible caang hna zong zohchih dirkamh in an hman ve tawn kha kan hmuh. Hi Bible caang hna cu tamdeuh in an hmanmi bibile caang hna langhternak asi.

Cunglei i bible caang hna sullam chimduh mi le biafang hmannak a hmanning hna kha bible a chimnak a caan le hmun, a chimtu le a ngeitu hna, khi bible a chimlio i a chuakmi siningcang thil cannak a canning hna kha dikthliar in cekhlatnak tuah tikah, tuchan i thlacam pumhnak ah a cangtawn mi rilhnak, `tahnak, khuaruahhar thil cannak a canning le pehtlaih pehparnak, aalawhnak hna a umlo kha Cardinal Suennens nih a fianter.31 Cf. Cardinal Suenens, A controversial pheomenon,38-39 Cuve bangin, bible thiamsang George Maloney, SJ nih “Tuchan i a cang`heo mi kha khuaruahhar thilcannak a canning hna cu bible ah hmuh asilo, bible thiamsang hna cu pakhat tein an rak fianter mi asi i, keimah zong nih ka hmuhlo” tiah a rak `tial. 

George Maloney, SJ nih a `tialpah mi cu; Zultu Peter, Paul hna le zultu vialte hna cu phungchim ah siseh, thlacamnak ah siseh `thawnnak hna a langhter i ngandamnak a pek kha a bikin lamkaltu tuanbia ah fiangtein a `tialmi kan hmuh. Asinain, lamkaltu hna cu kutchuan thla an campiak hna tikah an kut an chuanhmi pa/nu kha molh i rilhnak, sining hmaanlo singing ziaza hna, aukhuannak le `tahnak, lawnghvanghnak, rul bantuk lawnnak tiin thil cannak a canning (khuaruahhar) a rak cannak kha a langhternak a umbak lonak kong kha bible a relmi paoh nih an theihmi a si.32 Cardinal Suenens, A controversial Phenomenon, 39

Thlacam pumhnak hna ah aatel vemi cheukhat nih rilhnak hna, a hleice thil cannak hna he pehtlaihin ahlei in cekhlattu pakhat asimi Anglican Siangbawi pakhat John Richard zong nih cubantukin a rak `ial ve. 33 See John Richards “Resting in the Spirit” in Renewal in Wales Today, 6 (Spring, 1984).

Cuve bangin bible thiamsang le siangbawi pakhat asimi Wolfram Kop-fermann zong nih George Malaoney, SJ le John Richard hna i an chimmi ningin cubangin a rak `tial ve. 34 Wolfram Kopfernmann, Rundbrief der charismatischen Geneinde-Erneuerung in de evangelischen Kirche (June 1983); 19-25 

Kutchuan i “namnak” thawngin Thiang Thlarau Pathian cu kutchuan a ingmi kha molh i rilhternak he pehtlaihin bible ah chirhchannak pakhat hmanh a um lo. Cupinah, a biapi mi pakhat cu hmailei bawknak le hnutawn rilhnak pahnih cu bible ningin a thleidan tukmi sullam a ngeih kha philh awk asilo. A ruangcu bible sullam sining siseh, biafang hna he pehtlaihin ahmaannak le ahmaan ningin siseh, hmailei bawknak cu upatnak, biaknak, mah pum i niamternak, hmaizah peknak le biaknak ti sullam a ngeih i hnutawn rilhnak cu bible ningin, Pathian asilo mi, Pathian he dairek in aa pehtlaih lomi pakhatkhat, phunkhatkhat huham nih rian a `tuannak kha langhternak, Pathian he a ralchanh mi (asiloah) ral asimi a fiannak (asiloah) mah pum i teilonak hna kha a langhter mi hmelchunhnak a si. 35 Cardinal Suenens, A Congroversial Phenomenon, 40.

Cardinal Suenens nih a langhtermi a dang pakhat cu bible ningpi in zoh ahcun Pa Pathian nih siseh, Fapa Pathian nih siseh, Thing Thlarau Pathian nih siseh, amah he aaton, aakomh mi hna kha vawlei ah thel ka dak in rilhternak kha voikhat hmanh a langhternak a umlo. Cuhleiah bawk in a biakmi hna hmanh kha “Tho law dir tuah” tiin nawl a pekmi lawng kan hmuh. Bianaah (Daniel 10:11/ Ezekiel 2:1 le Mt. 17:6-7). 36 Ibid. 

Add new comment

13 + 5 =