Zeibantuk in an Rilh tawn?

(2) NAK- ZEIBANTUK PUNGSAN IN DAH AN RILH TAWN? ²⁴

Rilhnak he pehpar in zeibantuk muisam in an ril tawn timi kha Cardinal Suenens nih diktein cekhlatnak a rak tuah. A cekhlat ning ah a rilmi hna cu an hnulei i letin a rilh kha a hmuh. A chingchiahnak ah hmailei bawk in rilh le hnulei i let in rilhnak pahnih cu bible ningin aakhat lomi sullam le aa thleidan mi sining hna an um tiah a fianter. Bible ah hmailei bawk rilhnak cu Pathian he i tonnak, Thiang Thlarau toih innak, vancung mi hna he ton i komhnak ah kan hmuh i, hnulei let in rilhnak kha khuachia nih a tlaihmi hna an thloppiak tikah hmuh an si tawn. Vawlei ah rilhnak he pehtlaihin bible ah kan hmuhmi cu: “Jesuh nih, Amah cu Keimah hi ka si, tiah a ti hna tikah khan, hnulei ah an i tawn i vawlei ah an tlu” (Jn. 18:6). “Jesuh nih thlarau cu ‘Daitein um law, mipa chungkhan chuak’ tiah a ti tikah khuachia nih cun mipa cu an dihlak hmaika ahkhan a tluk i a cungah `thatlonak zeihmanh tuah loin a kaltak (Lk. 4:35). Khuachia nih khan Jesuh kha a hmuh cangka in ngakchiapa kha mah hngallo in a tuah i vawlei ah a hrilh i heh tiah aa let i a buanbara zong a tawh dih (Mk. 9:20).

Bible ca chungah Bawipa Jesuh Khrih amah nih siseh, Thiang Thlarau Pathian nih siseh mi pakhatkhat kha hnulei leh in vawlei ah a rilhter i, sining hmaanlo ngaihchiat in i let a `tapter mi sining he pehtlaihin cawnpiaknak a umlo kha bible a relmi paoh nih hngalh dihmi asi.

St. Paul cu Saul sinak in Bupi kha hrem awk ah Jerusalem in Damascus lei a kallio ahkhan Saul cu a ceutuk mi ceu pakhat ruangah vawlei ah a tlu. Asinain Saul cu thinlung hmaanlo bantukin siseh, sining hmaanlo umtu ningcang le biachim aukhuannak pakhat hmanh a tuahmi a rak umlo (Lam. 9:1-9).

Thiang Thlarau Pathian cu sining hmaanlo umnak phun, thinlung hmaanlo hna i tuahsernak phun, santlailo umtu ziaza le sining phun, mi hna mithmai ah zohchia ningzak awk asimi sining phun hna kha a hringpiak kholonak kha zungzal in kan theihding mi asi. Aruang cu, Thiang Thlarau  cu Pathian asi i minung nih theihkhawh lomi sining tampi a siter khawh nain a thiang lomi, Pathian hmai le mihmai ah fihnung zohchia mi, mi lung a mawlhter mi, lungthin hmaan a hrawhter mi sining hna kha zeitik hmanhah a tuahlo i a serlo kha kan hngalh zungzal ding asi.

End Note

24. Cardinal Suenens, A controversial Phenomenon, 20-21