Sualthawinak Muisam

Cu bangin Biakamthar chan ah Jesuh Khrih hrimhrim cu biakamnak thar a si i mi vialte an sualnak in a tlanh i Catholic hna cu Jesuh a hnubik zanriah ei`tinak in a rak sermi, zungzal nunnak a pemi, Bawipa Thisa changreu thiang kha thlam fate chungah an chiah hnuah, a thianghlim mi puanthan in a si ah, aa dawhmi pangpar hna in a si ah, aa dawhkhawh chung aa dawh in an `tamhnak cu a si. Sullam ngeilo in an tuahmi a si lo. Phaisa kha a lak in pangpar hna, aa dawhnak menmen ah an soksam mi a si lo. Bible kha a hmaan ningin an zulhmi a si. Bible hlun chan ah biakam kuang hlun thawngin Israel mi hna cu Jeriko khua an ral hna kha an rak tei i khuaihliti le cawhnuk a luannak “Kanaan ram” kha an rak hmuh. Biakam thar ah Jesuh Khrih nih Vawlei khuachia satan ral kha a tei i a zungzal vancung pennak kha a pek `than. Cu Khrih i, “Nunnak changreu kha upat bu tein an biak i khuapi chungkhuate chungah put in a vahpi mi Catholic nih khuachia satan ral an tei i zungzal nuamhnak vancung ram an conak a si. Cuticun a biapi mi Bawipa Thisa changreu kha an biak taktak. A ruang cu Khrih cu, cu changreu in kannih he a um taktak ti an zumh caah a si. Cucaah biak`theng cungah mei an van. Pathian biakcaan paoh ah cunglei i Bible caang kha a zulh i a sikhawh chung in a tuah. Catholic zulhphung hna cu Bible in a pial tiah soisel in sual a phawmi hawikom cheukhat sinah biahal kan duh hna. Biak`theng mei vang hlah, mei van a hau lo, tiah a tinak Bible a um maw? A um ahcun ka sawhpiak uh. A um lo ahcun zeicah Biakinn ah mei nan van kun lo? Nannih  nih Bible lawnglawng zulh a herh tiin Catholic pawl a soisel tawnmi nan si. Cuti a si ahcun cunglei i Bible hna kha zeicah nan zulh nan tuah kun lo? Ngaite tiah cun Bible lawnglawng, Khrihfa pakhat cu Bible i aa telmi lawng tuahawk a si, tiah hmurka in au loin Bible chung taktak a zultu hna cu Catholic lawng an si kha a fiang ko lo maw? Catholic pawl nih zeicah aa dawhtuk le a thiangmi “Biak`heng” asiloah a hme mi “Biak`heng (thlam)” inn kip ah an ser cio kan ti ahcun Bible hlun i Moses kha Pathian nih biakam kuang ser ding a fialmi bia bangin an zulh cio caah a si. Pathian nih, “Zihmui khangh nak caah anri thing in biak`theng pakhat na ser lai,” (Exo 30:1) tiah a ti.
    Cucaah biak`theng hmete (or) phazaa sin an ser i phazawng-dan mei an van cio. Cuticun Catholic pawl nih an inn ah thing in siseh, rua in siseh biak`theng an ser. Cucu Pathian fialmi a si i a tung donghnih a vang dongkhat tungvang palh a si lai i dong-hnih a sang lai (Exo 30:2) tiah kan hmuh. Cuticun Catholic pawl mi ngantuk lo, hmetuk lo mah duhmi pungsan in biak`theng an i ser cio. Bible ahcun a cung le a vampang le a ki fong hna sui in na hut lai, a cung velchum kha suihri in na menh lai tiin a `tamhmawih ter hna (Exo 30:3). Cu bangin an biak`theng kha puanthan rang le pangpar hna in an `tamh. Bible nih, “Aaron nih mei-inn kha a zohkhenh hna tikah hi biak`theng cungah hin zingfa tein zihmui a khangh lai (Exo 30:7) a ti bang khan Catholic hna nih zing an thawh fate biak`heng ah phazawngdan mei an van, a ti kho deuh nih rimhmui an khutter.
    Cun Exo 30:8 ah “Aaron nih zanlei i mei a van hna zongah khan a khangh fawn lai. Hi zihmui khangh thawinak hi na tefa chan vialte tiangin ngol loin nan tuah zungzal lai” a timi kan hmuh caah cu tefa a simi RC hna nih zaan ih lai thla an cam tikah pha-zawngdan vannak kha an tefa chan tiang an tuah ve nak a si. Bible ningin “Aaron nih hin kumkhat ah voikhat in sualthianh thawinak kha a ki cungah hin a tuah lai. (Biak`heng tung a tluk lonak caah a si kho) Hmailei i a ra ding chan zongah hihi tuah hrimhrim awk a si lai,” (Exo 30:10) tiah Pathian nih a rak chim bangin, Catholic hna nih thilchia (khuachia) a `thawl khotu, cite le ticawh in Tlangbawi nih kutchuan in thluachuah a pekmi “Holy Water-Tithiang” in biak`theng in a thawk i innchung dihlak a theh i thluachuah a pek. ‘Tithiang’ kha biak`theng cungah a chiah. Innchungkhar hna zong tithiang a theh caah thilchia hna kha innchung in a `thawl dih i sualthawinak muisam in hman a si.