Teinak cu Bawipa ta a si

Na Min Thiang cu Upat si ko seh
Pathian a Min Thiang cu kan upat zungzal awk a si. A sunglawimi a Min cu vanmi hna he kan thangtthat tti lai. Bawipa Min tthawnnak le cungnung bikmi a Min cu dong lo in upat le thangtthat a si zungzal lai. Bawipa cu a zungzal in kan lawmh lai. Amah thangtthat cu a ngol in ka ngol lai lo tiah Psalm 34:1 a ti. Upat awk a tlakmi a Min Thiang tthawnnak thawngin Bawipa cu kan duh herhmi thlacamnak in si seh, zei thil kan tuah paoh ah si seh, a Min in si dih hna seh. A tthami nuncan ziaza in kan nun kan hmanmi cu Bawipa Min conglawmh a si i cu ti cun kan nun tikah midang kha lam dingah kan hruai, kan hmuhsak hna.
Teinak kan hmuhnak cu a Min tthawnnak thawng lawnglawng in a si. A Min Thiang nih lawmhnak le hna ngamnak tling cu a kan pek. Kan nih khamhnak kan hmuhnak le kan khamhnak hrampi cu a Min tthawnnak in a si. Amah thawng lawnglawng in khamhnak hi hmuh khawh a si. Zeicahtiah vawlei cung dih lak ah hin min dang zei hmanh a um lo a ti ( Lamkaltu 4:12). Kan ral a simi Satan le a rianttuannak vialte le kan mihring sinak nih a duhmi vialte kha Jesuh Min in rak do hna u sih. Teinak cu Bawipa ta a si. Cungnung bik a Min upat buin thangtthat hna u sih. Hi ruangah hin a sannak bik hmun ah khin Pathian nih a cawi i min vialte lak i Min cungnung bik kha a pek. Jesuh Min upatnak caah cun vancung i a ummi vialte si hna seh, vawlei le vawlei tang i a ummi vialte nih si hna seh, an khuk an i bilh lai i Pathian kan Pa sunparnak caah cun lei vialte nih Jesuh cu Bawipa a si an ti lai.Amen. (Philipi 2:9-11).