Thangtthat tlak mi Bawinu

Credit to Original uploader

     Bawinu Mary cu “Pathian a nu, minung vialte i nu a si” tiah na pom rih lo a si ahcun ruattthan hmanh. “Vancung mi hman nih veel he a khatmi Bawinu, na cungah daihnak um ko seh, Bawipa cu na sinah a um i thluachuahnak tampi in an pek,” tiah a chonh.(Luke 1:28). Hawidawt hna, ruah awk tlak ngaimi pakhat a si bantuk in mah le mah zong bia i hal awk ah hi Bible biatlang nih a kan zuamcawh.

     Kannih cu Bawinu nakin kan sandeuh a si ahcun upat awk a tlak hnga lo. Kannih cu Pathian lamkaltu vanbawi Gabriel nakin kan ngan deuh caah maw, Bawinu cu vanbawi bantuk in “veel he a khatmi Bawinu” tiah kan ti khawhlo hi a si hnga?  Vanbawi Gabriel nih cun Bawinu kha a thiangbik le a sangbik mi upatnak in a biak chawnh. A ngai te ti ahcun mi vialte hi misual kan si dih. Ka suallo a timi cu milih mihrokhrol an si ti kha Bible nih fiang tein a langhter (1Jn 1:8-10). Cucaah kannih misual hna nih sualnak a ngei lomi vanbawinak in kan ngandeuh caah Bawinu kha upat a herh lo kan timi cu a si lomi a si lo maw? Veel he a khatmi Bawinu ti awkah zeithil hna nih dah a kan donh?

     Cu lawng a si rih lo, profet vialte chungin a nganbik profet Johan Baptista i a nu Elizabeth nih cun Bawinu Mary kha “Nangmah cu nu vialte lakah thluachuak bik nu na si”(Luke 1:42) tiah a thangtthat hlei ah “Ka Bawinu”(Lk 1:43) tiah Pathian a nu a si taktak kha a fehter rih. Hi tluk a thiang(asang) mi hna hmanh nih Bawinu kha an upat a si ahcun kannih zeihmanh a si lomi misual hna nih kan upat duh lo, Pathian nu a si tiah kan cohlan rih lomi cu kan nun chungah a biapi ngaimi thil pakhat kan bau rih ti kha kan langhter khunmi a si kha kan i theih a herh. Elizabeth chimnak ah nu vialte lakah thluachuak bik nu ti lawngin pei a ti cu kannih pa pawl kan i tello a timi kan um rih a si ahcun “Nihin thawkin hmailei ahcun mi vialte nih thluachuak nu an ka ti lai,” (Lk 1:48) a timi Bible biafang kha kan sawhpiak hna lai.           

     Hawidawt, kannih cu pa kan si ahcun khoika in dah kan rat? Kan hrampi khoika a si? Pathian a zummi paoh nih Pathian sinin kan ra ti kha kan zumh cio. Cuti a si ahcun Adam le Eve hrinsor kan si cuh. Cuti a si ahcun kanmah zong mi vialte chan chungin kanni tel ve ko nain zeidah Bawinu Mary kha veel he a khatmi Pathian i nu tiah cohlan awk kan i harh ngai hnga? Kan cohlan rih lomi a ruang cu zeidah a si hawidawt. Kan lungthin thukpiin i dah `han caan cu a tu caan hi a si.

Add new comment

14 + 1 =