Thiang Thlarau kong apeh

Thiang Thlarau Kong a Peh

Thiang Thlarau i a rian poh ah thiannak he aa hlat lailo. Thiang Thlarau cu veel laksawng hna kha zumtu hna kha athiang mi asinak ina kan pekmi asi i, a thiannak kha zumtu hna cungah a kan toih. sual `thatlonak in luatding ah sual ngaihchihnak in forhfial a an auh hnuah thiannak theipar (Rom. 8:22) kha a kan hmuhter. Cuti asi ahcun Thiang Thara nih zeibntuk thiannak theiparhna kha a kan pek? Thiang Thlarau nih a kan pekmi thiannak `hathnemnak kan ti tiakah Thlarau sining taktak `thathnemnak laksawng hna he pehtlaihin St. Paul nih a chimmi cu;
    “Thlarau nih achuahter mi hna cu- dawtnak, lawmhnak, daihnak, lungsaunak, zaangfahnak, `thatnak, zumhawktlai sinak, nunnem toidornak le mah le mah i tei khawhnak hna an si. A minung sinak kha tuah a duhtawn mi thil le pumsa duhnak, pakhat le pakhat thinhun ternak le nahchuahnak hna kha hrial in kan nung lai” (Galati 5:22-23, 26).
    Voihnihnak Vatican tonpumhnak (LG. 41) nih Bupi a cawnpiak mi cu: aa khahlo mi nunning cio le pawcawmnak rian cio caah thiannak pakhatte cu Pathian thiannak kha si. Zeitindah cu thiannak ahcun kan i tel ve lai? Bible nih a cawnpiak mi cu Pa Pathian duhnak kha tuahnak (Jn. 6:38), Thiang Thlarau lam hmuhsaknak tangah nunnak an si. Bible nih “Maw.. Pathian nangmah nih tuah seh ti na ka duhmi tuah awk ah ka ra (Heb. 10:7,9; Ps. 40:7-8). Hibantuk Bible cawnpiaknak kha mah nunnak  siternak in siseh, mah le nunnak cio i ton mi harnak buainak hna, a ding le dinglo hri hnuhnak hna, `thatnak le `thatlonak karlak hri hnuhnak hna, huatnak le dawtnak karlak nunnak pek in i thimmi sining hna, rimthawlo a hakmi nunnak he i ton caan hna ah mah vailamtah kha Jesuh Khrih he hmunkhatte i putnak in a `thami thil, ahmaanmi thil, dawtnak he pehtlaimi thil, ningcangte asimi thil hna kha Jesuh Khrih minin i thim hnuah mah nunnak pek tiangin Bawipa sin dinfelnak in, zumtu poh cu mah nunnak cio in a thiangmi Pathian asinak ah telvenak nawl kan hmuh.
    Ahuap in chim ahcun, Thiang Thlarau he aa pehtlaih mi asi ahcun athiang mi sinak a ngei lai. Athiang lai kan ti tikah Pathian duhnak he aa tlakin kaan nun awk asi lai. Pathian duhnak he aa tlakmi nunnak kan ti tikah a cunglei i St. Paul cawnpiak mi Thlarau laksawng hna ah nunnak kha si. Cubantuk Thlarau sining `thatnak hna ah nun khawh dingin Pathian nih mah thazaang lawng i bochan dingin a chiahta lo. Thiang Thlarau Pathian cu kan tuahkhawh lomi thil hna ah a kan bawmhchanhtu asi (Rom, 8:26-27). 
    Tuchan Khrihfa tuanbia thar ah Thiang thlarau Pathian rian`tuannak le Bawipa huham hna he pehzulhin vawlei chan sining in kaupi kan theih kan hmuhmi cu alawk a umlo. Cubantuk Thiang Thlarau Pathian kong kan theih tikah ahmaan le hmaanlo. a`tha le `thalo. athiang le thianglo tiin cawn le cekhlat awk abiapi asi kha philhding an silo. Cuti cekhlatnak ah Thiang Thlarau Pathian i sining asimi thiannak cu cekhlatnak, cuaithlai soisel tuaktannak tuahkhawhnak caah a umlo awk a`thalo mi abiapi mi tahfung pakhat asi. Ahleikhun tukmi khuaruahnak phunkhat cu atu chanthar Khrihfa hna a khuhchilh mi kha kan hmuh. Cu ahleikhun mi khuaruahnak cu Thiang Thlarau Pathian he aa pehtlaih cang ahcun cekhlat ahau tilo, hlathlai zong ahaulo tinak asi. Khi khuaruatnak cu Thiang Thlarau Pathian minchalh in mah duhnak ningin chim a duhmi hna caah caan`tha hmuhnak innkapi hunpiaknak a rak si.