THIANTERNAK HMUN (PURGATORY)

Photo Credit

Protestant Bupi hna nih Vancung le Hell pi lengah hmunhma dang a um ti lo tiah an zumh.

Hlanliopi in Catholic Bupi nih Bible cacaang um tu ning a zoh tikah Vancung le Hellpi lengah sualthianh kan si khawh nakhnga sualman liamnak hmun (or) thianternak hmun (Purgatory) a um rih tiah a zumh. Bible chungah a cafang bakin “Thianternak hmun” tiah fiang tein aa tial lo nain, a um ko ti cu cacaang tampi nih an langhter. Fiang tein aa tial lo caah zumh lo ding kan ti a si ahcun Holy Trinity (A thiangmi Thumkomh Pathian), Incarnation (Pathian Fapa minung a cannak) Bible cathiang, timi hna zonghi a cafang bak tein a tialnak an um ve lo ruangah zumh lo ding an si kan ti ahcun kan palh lai.

Vailamcung thihnak thawngin mi vialte kan sualnak cu ngaithiam cia kan si cang lo maw? tiah biahalnak a um kho men. Cucu a hman ko nain cu Khamhnak nih cun kan sualnak pi he Vanram ah a kan luhpi lai tinak a si lo. Sual ngaihthiamnak kan hmu ko lai nain kan sualman cu kan liamtak hrimhrim a hau. Sualthianh kan sinak hnga, Mat; 5:26 ah “Bia ngaite kan chimh, dan an in tatmi a dongh khitkhet in na in hlan tiang thong ahcun na um lai,” tiah Jesuh nih a ti. Sualman liam cikcek dih hnu lawngah Vanram cu luhkhawh a si lai ti duhnak a si ko. Sualbiaceih hi thih hnu deuh ah a si lai a ti hih, 2Cor; 5:10 ah “Kannih cu kan dihlak in Khrih hmaiah kan chuak lai i, amah nih cun bia a kan ceih lai. Kan pum in kan nunchung i a tha siseh, a chia siseh kan tuah ning cio in kannih nih kan hmuh lai,” a ti. Kan kaa in ka zumh tiah kaa zumhnak thawnglawngin Vanram luh cawlhkhawh a si ahcun a cunglei Paul tialmi kan nunchung kan tuahserning cioin timi bia hi naal bia le cawhdehnak bia men a si ko hnga lo maw?

Thianternak hmun (or) sualman liamnak hmun cu vun zoh usih. “Thlarau in a nunnak cun thong i thlak mi thlarau hna sinah khan a va kal i phung a chim, (1Pet; 3:19). Fiangdeuh in 1Pet; 4:6 ah “Cu ruangah cun mithi mi hna sin zong i thawng`ha chim asi venak cu a si, annih cu midang cio bantuk khan an pum in an nun lioah khan bia ceih cu an si ve ko cang. Sihmanhsehlaw annih sin i thawng`ha chim a sinak cu thlarau in an nunnak ah hin Pathian a nun bantukin an nun khawh ve nakhnga ding caah a si,”.

Hellpi chung i a tla mi hna cu sualngaihchih duh lomi an si cang caah an sinah thawngtha chim a herh ti lo. Vawleitang timi bia hi (Phi; 2:10-11, Bia; 5:3) zongah kan hmuh. Cucaah Khrih nih vawlei tang i thlarau thong a tla mi hna a vung chimhnak hna hmun cu Vancung zong a silo i Hell pi zong a si fawn lomi hmun a si. Cu hmun cu Catholic Bupi nih “Thianternak hmun” tiah min a sakmi cu a si. Sualhme deuh a tuahmi hna le sualngan a tuahmi hna zong nih sual ngaihchihnak tak he Pathian sinah kirthan a duh tikah sualman liamternak hmun a si.

Jude 1:23 ah “Meichung khan chuah hna ulaw Khamh hna u, cun midang zong kha tih le hmaizah kemh hna u. sihmanhsehlaw an pumsa duhnak a neh mi puan hrimhrim kha cu hua hna u,”. Hellpi chung cun chuah khawh a si ti lo timi cu mirumpa le Lazaruh tuanbia ah a lang ko cang. Cucaah a cunglei meichung khan a ti mi hi Hellpi timi a si lo ti cu a fiang ko.

Mat; 12:32 ah “Mi fapa ralchan in bia a chimmi cu ngaihthiam khawh an si ko lai nain, Thiangthlarau ralchanh in bia thalo a chim mi cu tuchan ah siseh, hmailei chan ah siseh, ngaithiam khawh an si lai lo,” a ti tikah “Hmailei chan” ah hin sualngaithiamnak a um rih ko ti duhnak a si caah, cuka hmun cu thianternak hmun a ti duhnak a si ko. Vancung le Hellpi lawng a um ahcun Jesuh nih hmailei chan ngaihthiamnak a timi cu a um kho hnga lo. Hellpi chungtla cio thlarau hna zong ngaithiam hau an si ti hnga lo. Cucaah ngaihthiam khawhnak hmun a simi sualman liamnak hmun cu a um hrimhrim ti cu a fiang ko cang.

Add new comment

13 + 4 =