TIPILINNAK KONGAH

Credit to Original uploader

Catholic, Orthodox, Englican, Methodist le Lutheran Bu hna nih an fale hna cu an ngakchiat lio tein Baptisma (tipilnak) an pek. Tipilnak hi Bible chungah cun ngakchiat lio tein, tiah a cafang te cun ai ttialnak cu a um lo nain, an chungkhar ningin Tipil an ing colh ti le Khrihfa hmasa hna an cattial mi chungah ngakchia Tipil an peknak hna kong zoh tikah, Ngakchia tipil pekmi cu a hman ko tiah Bupi nih a fehter chin mi a si.

Khrihfa hmasa hna nih upat hnu in Tipil an in mi hi lungfian a hau. Lamkaltu hna nih an chimmi thawngttha cu upa lungfim sin lawngte ah a si i, a zum i tipil a ing mi zong cu anmah cu an si a hau. Asinain cu lio zongah ngakchia cheukhat cu innchungkhar ah nu le pa zumhnak in tipil a ingmi an um ve ko ti hi theih ve a hau. Lam; 16:33 ah “Chikkhat te ah amah le a innchungkhar dihlak in tipilnak an ing colh,”. Inn chungkhar dihlak timi biafang hi a thawhkehnak Greek holh um kalning an hlat tikah, innchungkhar i upa in ngakchia pin ah sin um le salle tiang in a huap dih tiah an hmuh. Lam; 16:15 ah “Amah le a innchung i a um mi hna nih khan tipilnak an in”.

Ngaikchia cu nu le pa zumhnak an i hrawm kho timi hi hngalh hrim a hau. Mark 5:35-43 ah “Jesuh nih ngakchia nute i a pa kha a zumh bel zum ko a ti i, cu a pa zumhnak thawngin a thi ciami a fanu te cu nunter tthan a si,”. Matt; 15:21 ah “A fanu nih zeihmanh a hngal lo nain a nu zumhnak thawngin a fanu nih damnak a hmuh. John 4:51 ah A fapa nih ka pa nih zei a tuah ti a hngal lo nain a pa zumhnak thawngin a fapa nih damnak a hmuh.

Bupi chungah ngakchia hna aiawh in nu le pa nih zumhnak bia an chim tikah a sawhsawh in siloin biakam bak tein, hi ngakchia hi a upat tikah Pathian bia a theih awk a herhmi vialte ka cawnpiak hrimhrim lai tiah biakam a si. Nu le pa tampi nih kan biakam kan pelh i, fale caah a herhmi Zumhnak le Khamhnak kong cawnpiak an si lo tikah upat hnu in tipil in tthan duhnak thil buai hi Bupi nih a ton tawn.

St. Origen nih AD. 230 i a ttialmi cauk chungah “Ngakchia tipil peknak cu Lamkaltu hna sinin lakmi a si” a ti. AD. 135-202 chung rian`uan mi St. Irenaeus zong nih Ngakchia tipil innak cu a thar in tuah mi a si lo a ti ve. Kum zabu pathum hrawng i ttialmi Pathian biakning tiah ttialmi cauk zongah Lamkaltu pupa hna cawnpiaknak timi chungah ngakchia chuakka tipil nan pek hna lai, tiah aa ttial. AD. 354-430 lio St. Augustine `ialmi cauk zongah ngakchia tipil peknak cu Lamkaltu chan in pehzulh mi a si, a ti. AD 215 ah Rome khua ah an ttial tak mi Bupi cawnpiaknak kuttlaih cauk timi chung zongah ngakchia cu anmah tein zumhnak bia an chim khawh lo caah Tipil an innak dingah nu le pa nih timh tuah piak ding tiah ai ttial fawn. Hlanlio bik thlan pawl an hlathlai tikah ngakchia an chuah ni le an tipil in ni zohnak in, Lamkaltu chan lio tein ngakchia tipil an pek hna ti cu hngalh khawh a si fawn.

John 3:5 ah “Ahohmanh ti le thlarau in hrin a si lo ahcun Pathian pennak chungah a lut kho lai lo,” tiah a ti tikah, ngakchia zong cu “Ahohmanh” timi chungah an i tel ve ko caah Khamhnak hmuh a duh mi poah nih Tipil in cu a herh ko. 1 Peter 3:21 ah “Cucu atu i nanmah an Khamhtu hna tipil innak a rak sawh tu hi a si”.

Asinain Mino tampi cu sualnak tampi a tuah kho cang mi an si nain, tipil a ing lomi an tam tuk tikah dantatnak hi anmah nih maw an in deuh lai, a cawnpiaktu hna nih dah timi hi cattialtu keimah tein khua ka ruat tawn.

Add new comment

1 + 2 =