TTP cu `Thennak Bawi asilo

Thiang Thlarau

Thiang Thlarau Pathian cu Khrih ah Pathian miphun thar kha a khawmhnak ah Bible i a cangmi holh phunphun hna, aa `then`thek mi miphunkip hna kha (Gen. 11:1-9), hmasabik Pentecost ni ah a pumh hna i, aa dang mi holh phunphun hna kha siseh, miphun `tengnge dangdang cio kha siseh, hmunkip le pengkip a ummi hna i ti le ram`hen hna i ramri `thennak hna siseh, Thiang Thlarau Pathian nihcun a hrawh (Lam.2:1-11). Pentecost ni ah a rak `tummi Thiang Thlarau Pathian cu `then`theknak hna kha hmunkhatte ah asiter mi Bawipa a si. Pentecost ni ah a rak `tummi Thiang Thlarau Pathian cu miphun zulh in, holh zulh in, hmun le tlang zulh in an ca cio ah Bupi saknak he a ralchan bakmi Pathian a si. Aruangcu `hen`hekmi miphun dangdang hna, aa khatlo holh phunphun hna kha zumhnak pakhat ah tipil innak pakhat in Bawi pakhat  (Efs. 4:5) i pakhatte lawng asimi pum pakhat sinak (Efs. 4:23) in Thiang Thlarau Pathian nih a sak.
    Cu Bupi cu Pathian inn rangpi asi i, Jesuh Khrih kha a zumtu hna cu cu Pathian inn rangpi fale an si. Jesuh Khrih a zumhmi vialte cu miphun cio in, caholh ning cio in, vawlei hmunhma ning cio in annih caah Pathian inn asi tiin Bu an dirh cio lo. Lamkaltu hna thawkin profet asimi hrampi cungah thapkhat in an sakmi asi.
    Khi  tlakrawh innki, innkil lung cu Jesuh Khrih asi. Cu lung he tlakrawh inn dihlak cu pehtlaihin a `than caah, Bawipa caah a thiangmi Biakinn (Bupi) asi. Cu biakinn zongah Pathian cu Thiang Thlarau in a umnak ding caah Khrih a zumtu vialte cu lamkaltu hna he hmunkhat in sak asi (Efs. 2:19-22).
Cucaah Thiang Thlarau Pathian kha hngatchanh minchalh in siseh, Thalrau laksawng hna kha hngatchanh minchalh in siseh, vawlei lei kong, miphun kong, zatlang nunphung le a dangdang konglam tampi hna minchalh in siseh, lamkaltu hna sinin kan rak lakcia mi zumhnak he pehtlai mi cawnpiaknak hna he aa ralchanh mi bu `hentheknak hna a tuahtu hna, a palhnak kong a chim tawntu hna kha ralring in hrial ding asinak kong kha mithiang Paul nih fektein ralring a rak pek (Rom. 16:16-17).
    Bu `thentu kha voihnih tiang chimh i a ngaihchih lo ahcun Bu chungin `hawl an silai. Aruang cu cutin bu `thentu cu Thiang Thlarau Pathian he aa pehtlai lo, minung kokek ning in a zul mi asi. Cupinah cubantuk mi hna cu mah sualnak aa theihko buin sualnak a tuah i Thiang Thlarau Pathian min kha ningcang lo hman nakin a lettalam thinlung a ngeimi an si (Titus 3:11) tiah mithiang Paul nih a rak cawnpiak. Bu `thennak a chuahtertu hna cu an pumsa duhnak nih a ukmi, Thlarau a ngeilo mi an si (Judas 1:19).
    Thiang Thlarau Pathian cu bu thleidannak, bu`thennak, bu dirhnak hna he aa pehtlai lo. Khrihfa bu dirhnak caah aho sin hmanh kha ceunak le laksawng a pe hna lo. Asinain, Jesuh Khrih nih a rak dirhmi pakhat pumkhatte asimi Bupi sakcio dingah pakhat cio kha laksawng a kan pek (1Cor. 12:14). Bawipa Jesuh Khrih hrimhrim nih a chimmi cu “Keimah a ka `tanhlo mi cu a ka raltu an si, pumhkhawmh a ka bawmlo mi cu `thektu an si” (Mt. 12:30) tiah a rak ti. Cuti a chim tikah Jesuh Khrih cu Thiang Thlarau Pathian thawngin Pathian caah miphun hna kha a pumhkhawh hna i, cheuhnal ternak, `thekdarhnak, bu `thennak cu Pathian rian`tuan le Pathian duhnak asilo tiah a cawnpiak. 
    Thiang Thlarau Pathian cu minung bantukin `thencheunak hna sal asimi bawipa asilo. Minung hna i `thencheunak hna, thleidan richiahnak hna le a dangte sinak hna vialte kha pakhatte pumkhatte sinak ah a pumhkhawh tertu Bawi asi. Zeitindah asi, kan tiah cun, Thiang Thlarau Pathian pakhatte cu veel laksawng phunphun kha mi pakhat cio nih cove hna seh tiah a duh bangin a `thenhcheuh cio hna (1Cor. 12:4, 11). Zumtu pakhat cio nih kan comi veel laksawng phunphun hna cu bu `thennak, bu cheunak hna caah asilo. Mi pakhat pumpak ngeihmi bantukin mah duhnak ningin tuahawk ca zongah asi fawnlo. Khrih pum asimi Bupi sak dingah asi (Efs. 4:11-12). Cuticun zumtu vialte hna cu “Kan zumhnak le Pathian Fapa kan hngalhnak ah khan kan i fonhdih lai; nutling patling kan si lai i Khrih tlinnak a sanning taktak zong kha kan phan ve lai (Efs. 4:13).
 

Add new comment

6 + 5 =