Tuufa Zaanriah

A THLITE THIL TUAHNAK HMUN A UM LO, HNAWH A SI

Biathlam cauk cawn ka thok tikah hin, keimah cu protestant pakhat ka rak si rih,  Calvin bu chungah a telmi Pathian kong a rak cawng mi ka si i Pathian thawng`tha kha ka chim ve. Midang evengelist hna bantukin, Vawlei dongh lai thil a cang ding mi kong nih a ka `tem`tawn ngai te. Mah hi Bible ca a si, a ngaite kan ti ahcun, kei cu Bible ca lawng hi ka tlaih. Zeicahtiah, hihi cu zumhnak i a hrampi a si. A dangteh a um ti maw, Biamthlam cauk cu, Bible cauk i a donghnak bik a ummi a si caah, hi nih hin a fiang mi hmunhma kha a tlaih. Pathian nih a donghnak bik a chimmi bia kha a si. Cu lawng siloin Biathlam cauk cu keimah caah cun a sullam a thuk ngaimi le, aa thup mi cauk Bible ca kha a si, i ka hmuh mi ah hi kong hi cu a sangmi banh khawh lomi ah ka rel. Can dongh lai i thil a tlung dingmi thil kong cu ruah tikah mi a tuaitam ngaite, asinain Pathian nih hi kong hi theih awkah a ka hman, phunghram cauk khuaihmal awkah a ka fial mi a si.

Bu tampi ka ngei. A voi hnihnak kum thong ram cu a dih dengcang, Biathlam cauk i a sullam fianternak cu innfate pakhat chung i sehzung ah khan a hung puak, cu lio cu ka unau thawng`tha a chimmi hna lakpi ah khan a si. Ka phaknak paoh ah Biathlam cauk cu a thar mi le zumh tlak chin lengmang mi in ka hmuh.

Mah hi cu protestant holh lettu hna he aa pehtlai mi a si lo. A hmsabik protestant martin Luther nih cun caan dongh lainak kong thil kong a hmuhmi cu chiatnak lei thil kong min a thangmi ah a chiah ve. Chikkhat te cu, hi ka zawnte Bible ca cu a el, zeicahtiah, hi ti hin a ti, “Biathlam timi cu a langh awk a si”, a ti. Asinain Biathlam cu a lang peng ko, hi nih hin ruahnak `tha lo rak ngeih chungmi le, lungretheihnak, le mah nih a `thabik timi thil tuahnak hna kha an si ning a fiantertu kha a si.

Caan dongh lainak a cangmi phun a taang mi kha Khrihfa mi hna caah cun a si. Phungchimtu hna nih a pakhatnak an zuammi cu cauk chung i nawlpek mi thleidannak kha a si. HIhi an zuamnak ah a theipar a tlai loh, zeicahtiah nawlpek mi phung kha rian vun `tuan tikah chambaunak a um. I pumhkhomhnak lei le bia elnak ah a chambau. Nawlpeknak a um lo tikah, anmah tein nawlngeihnak kha an i khinh. Mah hi cu a tlawm le a tam kha a si ko, zohchunh awk an ti mi kha protestant cawnpiaktu ka rak si lio ah ka rak zulh. A hung cang `theu tawn mi cu a um ek i tuahmi thil nih ruahnak kha a tlaih i cauk a dih lakpi in relnak kongah a sullam leh a hau mi tawhfung kha a si. “Kumthong ram” kha bianabia ah vun la ta hmanh pom mi ah a langmi cu Apocalypse dal 20 nak ah pom mi le a lang mi a si - dal 1-19, le dal 21-22 nak i hmuh mi kha cu a muisam zong phun dang tein `tamh kha an thok.