VANCUNG A UM KAN PA

PAWIPA THLACAMNAK (MT 6:9-13)
Kan Bawipa Jesuh cawnpiakmi thlacamnak cu kan nu Bupi nih a Biaknak ah a biapi ngai in a hman. Cu bantukin zumtu hna kan ca zongah a biapi tuk ti kha vun langhter tthan usih. Hi thlacamnak cu a dangdang thlacamnak nak in a tling deuh suamau. Bawipa Jesuh i cawnpiakmi thlacamnak cu a ho nih dah a cam? Pathian fanu fapa a simi zumtu mi hna nih kan cam zungzal. Zeiruangah dah kan cam ngam? Kan Bawipa Jesuh Khrih amah hrimhrim nih a kan cawnpiakmi a si caah ah ralttha in kan cam i zumhnak in kan cam ngamnak cu a si. Bawipa thlacamnak cu tthen riat in tthen a si.
1. Vancungah a um kan Pa
2. Na Min Thiang cu upat si ko seh
3. Na Pennak tlung cang ko she
4. Vancung bantukin leicung ah na duhnak tling cang ko she
5. Nifa kan herhmi rawl kha nihin kan pe ko tuah
6. Mi nih kan cung I an sual tik ah kan ngaihthiam hna bantukin kan sualnak cu kan ngaithiam ve tuah
7. Tukforhnak chungah kan phakter hlah
8. Tthatlonak chungin kan khamh ko tuah, Amen.

VANCUNG A UM KAN PA
BAWIPA PATHIAN cu kan nih minung vialte I kan Pa a si. A zungzal in a nungmi thlarau pum in a van mithiangmi hna le vancungmi he vancung khua ah a um. Kan nih cu Pathian fanu fapa kan si dih. Pathian nih a duhmi cu minung hna nih hin a mah kha zumh le dawt kha a si. Cun a mah kha I bochan in Pa Pathian dawtnak chungah hmunkhat te le lungdai tein um kho hna she ti kha a kan duh piak. Cu caah Pathian cu kan nih nih kan Pa tiah kawh le auh cu a duhmi a si. Pathian cu dawtnak a sic aah kan nunnak cu dawtnak in kan I thuamh awk a si. Kan minung hawi hna kha unau ttaa far bantukin kan dawt khawh hna tik lawngah Pathian cu kan Pa tiah kan auh khawh lai. Mi zei maw nih Pathian ka dawt a ti I a u nau a huat ttung ah cun a mah cu mi lih chim a si. Zei caah tiah a hmuhmi a unau hmanh a dawt khawh lo ah cun a hmuh lomi Pathian cu a daw kho lai lo. Pathian a dawmi nih cun a unau kha a dawt hrimhrim lai tiah Pathian Bia nih a kan chimh (1Jn 4:20-21). Pathian cu vancung ah a um bantukin vawlei zongah a um. Jesuh nih hitihin a chim, “ a ka dawmi paoh nih ka bia kha an ngaih lai. An nih cu ka Pa nih a dawt hna lai I ka Pa le Keimah cu kan ra lai I an sinah kan um lai,” tiah a ti (Jn 14:23). Pathian cu kan Pa a sicaah kan nunnak taktak in kan upat khawh ahcun kan Pa tiah kan kawh khawh cang. Pathian sin I thla nan cam tikah a Mah cu kan Pa tiah nan kawh ttung ahcun hi vawlei cung nan nun lio ah hin a Mah upat bu tein nan um awk a si(1Pet 1:17).