Zeicadah Catholic pawl nih khuk pakhat bil lukunnak an tuah?

Hakha, Siangbawi umnak center. Siangpahrang vialte lak i Siangpahrang, kan Pathian hmai ah khukbil upat peknak(Filipi 2:10-11). Photo - RVAHakhaChin

 

Solomon Siangpahrang cu Israel ram ah hnham (rumra) ngei bik le thil tikhawhnak (power) angei bik Siangpahrang pakhat a si. A hnu zultu hna lawng si lo in ramdang in a ra mi hmanh nih a hmaika an phanh tikah khukbil in upatnak an rak pek tawn. Hlanlio ah cu tuahsernak cu upat hmaizahnak le nawl ngaihnak muisam langhternak a rak si.

        Sihmanhsehlaw (2Chanrelnak;6:12-13) ah kan hmuh mi cu, huham ngeitu bik a si, tiah kan ti mi Solomon Siangpahrang hmanh nih amah nih a sak cia mi Biakinn chung a lut i biakṭheng hmaiah khukbil in a lu a kun ti mi kan hmuh. Amah nih Siangpahrang vialte lakah Siang pahrang, a dong lo huham ṭhawnnak he a khatmi, a thiang a sang bik mi, Van le vawlei dih lak uktu kan bawipa Pathian hmaika ah ka phan (ka dir) ti kha a hngalh caah a si.

        Chanthar nunphung ah “Khukbil a herh” ti mi zumhnak kha nihsawh kan duh cio. Mitam-uak nih tuah sernak phun hna kha chan lai nunphung a tang mi ah kan hmuh cio. Tuchan ah “huham zor-zumchuknak” a si tiin an pom mi a si. Asinain Catholic Khrihfa hna tu nihcun, Pathian cu aa thleng lo i Pathian a si pengnak kong le “Vancung, Vawlei le Vawlei tang ummi vialte nih an khuk an i bil lai i Pathian sunparnak caahcun lei vialte nih Jesuh cu Bawipa a si, an ti lai (Filipi 2:10-11) ti mi Bible caang kha an pom cio. Cucaah Catholic Khrihfa hna nih cun Bawipa hmaika i khuk i bil kha a hleikhun mi ah pom cu a si. Zeicahtiah Bawipa cu kannih upat hmaizahnak le a nawl ngaihnak kha a bik in cotlak mi a si caah a si.

        Bawipa Jesuh cu Bawipa Thisa Sacrament ah a thi le sa sinak in siseh, Thlarau le Pathian sinak in siseh a um. Cucaah Catholic Khrihfa hna cu, Biakinn chung Bawipa Thisa chiah in pekchanhnak biakṭheng hmai an phan tikah orhlei khuk bil lukun in upatnak an peknak cu a si.

(Ref: The New Catholic Answer Bible)

 

Add new comment

8 + 9 =