ZOHKHENHTU VANCUNG MI

Credit to Original uploader

 

Athiangmi kan nu Bupi nih kanmah a kan zohkhenh tu vancungmi an um tiah a kan cawnpiak. Kumfatin October Nihnih ni ah “Zohkhenhtu vancungmi puai” kan tuah. Zoh khenhtu vancungmi an umnak kong hi Pathian duhnak a si maw? Asiloah Bible he aa kaih maw? ti kha hngalh ter kan duh hna. Catholic Bupi nih a cawnpiakmi poah hi Bible he aa ralkah lo ti zong hngalhter kan duh hna. Cucaah zohkhenhtu vancungmi an um taktak nak kong, anmah nih tlanhmi minung kha an zohkhenh i minung zong nih upat ve ding an sinak kong kha Bible cherhchan in langhter ka duh.

  • Hebrew 1 : 14 “Vancungmi cu Pathian rian a `uantu Thlarau, Khamhnak a hmu hngami bawmh awkah Pathian nih a thlahmi kha an si,” tiah fiang te in a chim. Bible hlun chan ah Pathian nih vancungmi kha a mi hna lamhruai dingah a thlah hnanak kong kan hmuh.

(b) Exodus 23:20-23 “Lampi i nanmah an hupphengtu hna le ka tinhmi ram i an luhpi tu hna caah vancungmi pakhat ka thlah lai. Amah chimmi kha ngai u law, a chim mi kha zul u. Amah cu keimah min in rian a ttuanmi a si caah rak doh hlah u; cu bantuk palhnak cu an ngaithiam kho hna lai lo. Asinain amah bia kha nan ngaih i ka chimmi vialte kha nan tuah ahcun nan ral kha keimah nih kan doh piak hna lai i an do tu hna a dohtu kha ka si lai. Ka vancungmi kha na hmai ah a kal lai i na duhnak ah an hruai lai,” tiah Pathian nih a ti.

          (c) Salm, 91 : 11-12 “Na kalnak kip i nangmah zohkhenhtu ding ah Pathian nih a vancungmi kha a chiah hna lai. Ankut in an in dawmh lai i lung ah na ke kha aa khawng lai lo,” a ti.

(d) Tobiah 12 : 12 - 14 “Vancungmi Raphael nih a chim mi cu, nangmah Tobiah le Sarah nih thla nan cam tikah, nan thlacamnak kha Pa Pathian sinah an chimhpiaktu cu keimah hi ka si ... nangcu cu ni ah zanriah ter lo in khulrang tein na tho i mithi kha na vui tik hna zongah nangmah kha hlathlai dingah Pathian nih keimah kha a ka thlah. Cun nangmah le na monu Sarah kha damlak tiang in thlopbul ding zongah Pathian nih a ka thlah fawn,” tiah a ti tthan.

          Bible Thiang Cathar ah zohkhentu vancungmi an umnak kong kha Jesuh Khrih nih a chimmi cu:

          “Hi ngakchia tete hi pakhat hmanh zawmtai hna hlah u, annih a vengtu hna vancungmi kha, vancung khua ah, ka Pa hmaika ah an um zungzal ko,” tiah a ti hna (Matthai 18 : 10 zoh).

          Khamh ding mi hna kha zohkhenhtu vancungmi an um lo ahcun, Jesuh Khrih nih “An vancungmi” tiah a ti hnga lo. Cucaah vancungmi cu an um taktak ko i kanmah zohkhenhtu ah thlahmi vancungmi zong an um taktak ko ti kha Jesuh Khrih nih a kan cawnpiak. Cucaah zohkhenhtu vancungmi an um ko tiah zumh cu a hmaanmi zumhnak a si. Kan nu Bupi nih a kan cawnpiak mi zumhnak biathuk hna cu Bible he aa ralkah lo ti a fiang.

          Cu hnu ah Bupi nih, “Maw a ttha vancungmi, keimah zohkhenhtu ah Pathian nih a chiahmi, ka ceuter in ka venglaw ka hruai in ka peng ko, chun nitlak in zan khuadei tiang, Amen,” ti in thlacamnak kha a kan cawn piak. Hi thlacamnak cu zohkhenhtu vancungmi sinah cam awk aa tlakmi a si i a cunglei i Bible cafang pawl kha a fehter mi le tette a khanmi a si.

          Ahnubik ahcun Khrihfa poah nih zohkhenhtu vancungmi kha i bochan awk le a bia ngaih awkah Pathian pekmi ttuanvo kan ngei cio, tiah ruahnak cheuh kan duh ve hna.

Add new comment

7 + 6 =