ZUMHNAK BIATHUK A SI(2)

Bawipa thisa kong hi biathuk hna lakah biathuk nganpi pakhat a si. Azumh a har ngaimi biathuk a si. Sihmansehlaw Bawi Jesuh nih zumh khawhnak dingah lam a kan sialpiak ko. A cawnpiaknak lawng in si lo in khuaruahhar a tuahnak in a si. Changreu tlawmte kha mi thong tampi a dangh hna(Jn 6:1-15, Lk 9:12-17, Mk 8:1-9), cun ti kha misurzu ah a thlen(Jn 2:1-11). Sihmanhsehlaw Bawipa thisa cu cunak in a thuk deuh saumau.  Changreu cu a um cia mi thil, ti zong cu a um cia mi sermi thil a si i sermi thildang ah a thlen mi a si. Zeikhawm a si ah khuaruahhar awk a si `hiam`hiam. Bawi Jesuh kong tu ahcun zumh khawhlo awk hrimhrim in a um taktak. Pathian fapa cu minung ah a cang i a tu cu minung men kha si ti lo in changreu le misurzu ah a cang mi hi a si. Zumhduh len ko zong ah zumh ngam ding a si lo mi bak a lo. Siseh zumhnak a thawtter bik mi ah a cang `han.

Pumsa nih a hngalh khawh lo mi cu zeitindah zumh khawh a si hnga? Pathian a tuah khawh lo mi thil zeihmanh a um lo tiin zumh hi a phi pakhat cu a si. Paa he i duhnak um lo in Ngaknu Thiang Mary nih Thiang Thlarau `hawnnak in Pathian Fapa Jesuh kha a pawi khawh ahcun changreu le misurzu zong Bawipa thisa ah a canter khawh ve ko(Lk 1:34-37). Bawipa thisa cung zumhnak ngeih ding ah minung `hawnnak cu a za lo, Pa Pathian nih a hnuh hna a hau. “A ka thlahtu ka Pa nih a hnuh hna lo mi poh cu ahohmanh ka sinah an ra kho lo,”(Jn 6:44) Bawi Jesuh a duhning tein a thi le sa kong vun zumh ding ahcun Pa Pathian nih special zumhnak a pek mi an si a hau.

Zumhnak biathuk a thawtnak hi dawtnak in kan chim tawn. Pa Pathian le Fapa Pathian a kan dawtnak cu Kalvary tlang vailam cung i Bawipa a thihnak in kan chim tawn. Cu lawng cun Bawi Jesuh a lung a tling kho lo. Changreu le misurzu in kan rawl le kan ti si a  duh. Amah a zummi hna le a dawmi hna nih ka ei hna sehlaw ka ding hna seh ti a duh. Mah bantuk dawtu Pathian cu zeibantuk Pathian dah a si hnga? Amah le amah aa niamter mi Pathian, minung cannak sawhsawh si lo in sal cannak a la mi Pathian, sal sawhsawh lawng a si lo,  a mi hna an ti le rawl ah a cang rih mi Pathian, Bawipa thi le sa ah kan Bawipa Jesuh cu a niambik in a lang `han i  a dawtnak kha tling tein a phuan. (Phil 2 : 6 - 8). Mah nak in a kan dawthiam deuhmi Pathian kan hmu ti lai maw?