ZUMHNAK BIATHUK A SI(3)

Cucaah Bawipa thisa cu dawtnak nih a ser mi khua ruahhar biathuk Pathian dawtnak lawng nih a ser khawhmi biathuk a si. Zeitluk khuaruahhar dah a si! St. Augustine nih hitin a ti: “Pathian cu zeizong vialte a tuah kho tu a si nain, tam deuh a pe kho ti lo. A fim ngaingai nain tam deuh peknak lam a hngal ti lo. A rum ngaingai nain, tam deuh pek awk a ngei ti lo”, a ti. Pathian a sannak le aa niam ternak hi hngalhthiam khawh a si lo.

Cucaah mithiang Thomas Aquinas nih “ Cungnung bik mi Sacrament kha lu kun in kannih kan biak tiah a ti. Vancung ah upa pakul le pali, saram nung pali, vanmi hna le mithiang vialte hna nih a zungzal a nung mi le ttheng cung i an thah mi Tuufa hmaiah an bawk i an biak (Bia 7 : 9-12). Vancung ah cun an thahmi Tuufa in an biak. Vawlei cungah cun a nungmi Changreu thiang in kan biak. Mahhi Bawi Jesuh a lianngan sunparnak lawng nih a tuah khawh mi thil a si.  Khuaruahhar a tuah lioah mi nih an upat i an biak cu a phung a si tiah theihthiam khawh a si. Sihmanh sehlaw a nun lio ah amah a thattu Rom ral bawipa nih cun a thih le cangka “Mah pa cu Pathian fapa a si taktak ko," tiah a ti i a biak. Lamkaltu Thomas nih a thawh`han kha a zum lo, sihmanhsehlaw a kutphah, a kephah i thirkhenh hma kha a vun tongh i a hngak i fei hma ah a kut a vun sanh tikah cun a hmaika ah a bawk i, “Ka Bawipa le ka Pathian” ti in a biak.

Nihin ah kannih vialte nih cun Bawipa thisa ah Pathian lianngan sunparnak kan hmu lo, minung a si lio i  khuaruahhar a tuah mi zeihmanh kan hmu lo. Ka pum a si, Ka thi a si, a timi bia kha zumh in Sacrament Thiang hmai ah lukun khukbil in kan biak. Mah zong cu zumhnak biathuk a si. Bawi Jesuh nih bia aa kam: “Hmuhlo in a ka zummi hna caah thluachuah a um deuh”(Jn 20 :29). Hna a ngam, lung a `hawng ko!

 Vawlei cungah mit in hmuh lo in Bawipa thisa kong zumhnak biathuk cu kan ruah i kan khuaruah a har. Vancung ah Bawipa kha kanmit in kan vun hmuh tikah hmuh lo in kan rak zumhmi kha zeitluk indah a hmaan ti kan hmuh lai i kan khuaruah a har chinchin te lai. Cun a thisa zumhnak laksawng a kan pek mi caah Bawipa cung i kan lunglawmhnak cu a ngan ngaingai lai i fakpi in a thangtthatnak hla kha kan sak te lai, vanmi le mithiang vialte hna he hmunkhat in. Amen.