Chungkhar Dawtnak

Bawipa a bia ttimi Chungkhar

Bawipa thisa cu Catholic chungkhar hna caah cun pakhat le pakhat i pehtlaih nak le dawtnak hrampi pakhat a si. Cu a si caah Catholic chungkhar hna nih zarhpi ni le nithiang, nisunglawi ni hna ah a si khawh chungin pakhat hmanh bau lo tein biakinn ah kan kal tti hna nak hi a si. Cun minung kan si ningah thazang der nak a ngei mi kan si cio bangin, a caan ah pakhat le pakhat i theih palhnak hna a um khawh caah, a si khawh chungin thlakhat ah voi (1) sual thlahnak kan tuah zong hi a si fawn. Cu cu Pathian sin in sual ngaihthiam nak hmuh khawh nak ding caah siseh, a vel thluachuah kan hmuh khawh nak hnga caah siseh, pakhat le pakhat cungah sual ngaihthiam nak lungthin ngeih ding le a fek chinchin mi dawtnak kan ngeih khawh nak hnga ding ca zongah a si fawn.

Cu a si caah, Catholic chungkhar hna nih, mah pumpak zongin siseh, zeitluk in dah Missa thawinak hi kan sunsak ti hi ruat tthan hna u sih.

Thla a cam tti mi Chungkhar

Catholic Khrihfa hna cu chungkhar ningin thla a cam ti mi kan si. Bawipa Pathian nih a kan dawt ning hna kha theih in cu dawtnak hna cu a nun pi tu siding in auh zong kan si fawn. Pathian dawtnak kan nun pi khawh nak hnga ding caah chungkhar ning tein thlacam ti nak in siseh, Pathian nih a kan cawnpiak duh mi hna kha theih khawh nak hnga ding caah Bawipa sinah thlacam buin a hal peng mi kan si a hau. Pumpak thlacam lawng si loin kan umnak parish chungum Khrihfa hna he zong thlacam nak kan tuah ti tawnnak hi a si. Nifatin kan thlacam hna nak sullam cu:

  • Pathian thangthat nak ding caah le a thluachuah hna caah lawmhnak chim;
  • Midang hna cungah dawtnak tak in kan dawt khawh lo hna caan ah sual ngaihchih in Bawipa sinah zangfah hal nak;
  • Pakhat le pakhat i dawt chinchin khawhnak ding caah le kan vawlei pi caah thatnak kan tuah khawh chinchin nak hnga ding caah;
  • Pakhat cio in siseh, Pathian fanu fapa le vialte hna nih kan herh cio mi vel-thluachuah hal ding caah siseh;
  • Kan nunnak ah Pathian duh ning in kan nun khawh nak hnga caah tiin thla kan cam ti tawn hi a si.

Chungkhar pehtlaih ning

A biapi ngaimi cu, Khrihfa kan si cu pakhat le pakhat fek tein i pehtlaih hi a si (Jn 17:21) . Cu tin a si khawh nak ding caah chungkhar nu le va, pa le fale hna pehtlaih ning bangin pakhat le pakhat dawtnak in i pehthlaih khawh nak ding caah lam thar kawl leng mang ding zong a si fawn (Lk 10:27). Chungkhar pakhat ah fale a si mi hna zong hi nu le va kar lak ah hmuh khawh mi dawtnak a langhter tu an si bantuk in ruahnak ttha he pakhat le pakhat i pehtlaih hna in dawtnak he riantuan tti thiam hna i Bawipa dawtnak kha a langhter tu ding kan si.

Chungkhar caah zawnruah hmasat thiam

Chungkhar chungah pakhat le pakhat dawtnak in kan i pehtlaih nak cu Bawipa Pathian nih hi tihin siseh tiah a kan duh piak mi le a kan ser hnawh chan mi a si bantukin mah le chungkhar cio nih nifatin kan nunnak ah kan zeizong vialte ah a pakhat nak ah kan ruah i kan chiah cio tawn hna. Cu a si caah, rawl kan ei ah siseh, thla kan cam ah siseh, kan len kan kal ah siseh, pakhat le pakhat kan i chawnh kan i zohkhenh hi a si.

Tu lio Covid-19 zawtnak  hi vawlei cung khua zakip nih ton cio a si bantukin biakinn zongah kan i pum tti thiam ti hna lo. Inn ah kan um cio hna i Bupi hruaitu hna cawnpiak ning le nawl ngaih in Chungkhar cio hna nih thla kan cam ti cio hna. Bawipa sin in thazang kan i lak ti hna i Bawipa dawtnak kha kan nunnak ah kan langhter hna.

Dawtnak tehte kan si

Bawipa Pathian nih chungkhar hna hmang in kan vawlei pumpi hi a ther in remh tthan a duh. Bawipa duhning ah biatak tein tel khawh i zuam ve hna u sih.

Pakhat nak ah minung kip nih an duh cio mi dawtnak, lunglawmhnak le pehtlaihnak riantuan ti a thiam mi tehte si hna u sih. Cu cu chiat caan ah siseh, tthat caan ah siseh, zawtfah caan ah siseh, dam lio caan caan ah siseh, sifah caan ah siseh, rum zongah siseh i hrawm cio ding a si.

Pahnih nak ah, cu dawtnak hna cu kan chungkhar chungin leng kan chuah tikah midang hna cungah tuah ser ding le va langhter ve ding a si. Zeitindah  taksa lei in siseh, thlarau lei in siseh midang hna cungah kan tuah khawh ve lai timi ruahnak ngeih in Bawipa Pathian dawtnak mi vialte hna cungah, kan vawlei caah tuahser nak in langhter hna u sih.

 

Add new comment

2 + 3 =