INN CHUNGKHAR IN THAWNGTHA THAWKNAK

INN CHUNGKHAR IN THAWNGTHA THAWKNAK                                                                                             

            Keimah cu ka chuahka tein Khrihfa ka si. A ruang cu ka pa hi kan khua ah Pathian a thei hmasa mi pakhat a rak si i Baptist Khrihfa a rak si caah Baptist chungkhar in a tthangmi ka si. Ka pa hi Khrihfa hmasa a si lawng siloin Siang ca chim Sayaci zong a sicaah Bible ca tampi a rel kho i Jesuh tuanbia zong tampi a theimi a si. Cucaah aa manh caan paoh ahhin kan chungkhar le innpa chakthlang a kan pumh i Jesuh kong a kan chimhtawn. Ka hngakchiat lio ah a rak kan chimhmi tuanbia pawl cu a ruah awk hngal lo, tuanbia menmen ah ka rak ruah tawn nain atu ka upat hnu ah a sullam kaa fiang chin lengmang.

            A rak kan chimhmi tuanbia pawl hi Bible chungin a lakmi an si.

“Saya pa le Bawipa”

            Tuanbia a cheu nih thil lianngan a tuahmi kong an chim. Acheu nih mi runpi a cawnpiak hna ning an chim ve. Jesuh cu atu i Israel an timi ram ah a rak um. Khuakip ah a kal i thil lianngan le thil ttha a rak tuah. Mi zawmi a lamter hna. Hi thil vialte a rak tuahkhawhnak cu amah sinah Pathian a rak um caah a si. Mi a cheu nih Jesuh kha an huat, cucaah vailam cungah thir in an khenhchih i a thi. Sihmanhsehlaw nithum hnu ah Pathian nih a nunter tthan. Mi a cheu nih Jesuh hnu kha an zulh i amah kha an zumh. Amah cu ‘Sayapa le Bawipa’ tiah an ti. Hi tihin biatlang a domh i Jesuh kong tuanbia hi tampi a kan chimhtawn. A kan chimhmi tuanbia hna lakin ka philhkhawh lomi tete ka vun langhter lai.

1. Nu pakhat nih Jesuh lu kha zihmui a toih.

Nikhat cu Jesuh le a zultu hna Bethany khua an timi ah an phan. Simon an ti mi pa inn ah an lut. Amah cu thinghmui zawtnak a ngeimi a rak si. Rawl an ei lioah, Jesuh sinah nu pakhat a ra. Lungrang in tuahmi thawl fate a rak i put. Cu thawl cu mansung zihmui in a khat. Cu nu nih Jesuh lu cungah zihmui cu a toih. Jesuh a zultu pawl nih cu a tuahmi an hmuh tikah, mah nu cungah an thin a hung ngaingai i a sinah hi tihin an ti. “Zeicahdah mah zihmui na sawksam men? Tangka tampi ah zuar khawh mi pei a si cu, mi sifak hna sinah pekkhawh mi tangka an si deuh” an ti. Jesuh nih a zultu hna an chimmi cu a theih tikah hi tihin a ti hna. “Mi sifak cu zungzal nan sinah a um ko lai; asinain kei cu nan sin ah zungzal ka um lai lo. Cucaah hi nu hi zeicahdah hna nan hnawh chan? Thil dawhte pei ka pum cungah a tuah cang cu, vui dingah tlamtling in a timhtuah nak a si. Cucaah keimah kong Thawngtthabia an chimnak hmun paoh ah mikip nih hi nu kong an hngalh tthan cio lai, ka cungah a tuahmi kong tuanbia in an chimtthan tikah mah nu cu an theihtthan lai” a ti hna.

2. Pathian sinah thla a cam mi pa pahnih tuanbia.

Nikhat cu kanmah tluk in a tthami midang an um lo ti i a a ruatmi hna sinah Jesuh nih tuanbia a chimh hna. Farasi le ngunkhuai khawltu pa kong a si. Farasi mi nih Pathian nawlbia a zulkho bak mi cu kanmah lawng kan si, tiah an ruah. Jesuh nih hitihin a chimh hna; “Biakinn chungah pa pahnih thlacam ah an lut. Pakhat cu Farasi mi a si i a dang pakhat cu ngunkhuai khawl a si. Farasi pa nih amah dang tein a dir i hitihin thla a cam. “Maw … Pathian, kei cu midang bantukin miduh fak le midik lo ka si lo, midang an nupi sin zongah ka sual lo. Midang cu mah bantuk an tampi, kei cu ka si naisai lo. Hi ngunkhuai khawl bantuk ka si lo ca zongah hin nangmah cu kan thangtthat tuk ko. Zarhkhat ah ni hnih paoh nangmah biak awkah rawl ka ulh i ka ngeihmi thil vialte i cheuhra cheukhat nangmah kan pek.

Ngunkhuai khawlpa tu cu hnulei te ah a dir, vanlei hmanh zohngam loin. Ka ngaih a chia ko ti langhternak ah a ttang aa cum i, “Maw … Pathian misual ka si, ka zaangfah ko,” tiah a ti. Jesuh nih a tuanbia cu hitihin a donghter. “Hi ngunkhuai khawlpa tu nihhin Pathian duhnak a tuah deuh. Pakhat pa tu hi a si lo. Ngunkhuai khawlpa vancung i a kai tikah Pathian hawikom ttha a si lai,” a ti hna. Ka pa nih hi tuanbia cherhchan in thlacam ning a rak kan cawnpiak.

3. Jesuh nih Mi Thongli rawl a dangh hna.

Nikhat cu Jesuh le a zultu hna tlangzau ah an um lioah mi tampi a sinah an ra i an lakah a zawmi kha a damter hna. A zultu hna kha Jesuh nih a auh hna i hiti hin a ti hna. “Hika i a rami vialte caah ka ngaih a chia ko. Keimah he nithum chung an um cang i atu ah eiawk rawl zeihmanh an ngei ti lo. Eiawk pakhat khat tal pek hna loin kirter hna awkah ka duh lo. Rawl ei hmasa loin an inn ah an kir ahcun rawlttaam ruangah an buhri lai” a ti. Cu tikah Jesuh a hnuzul hna nih, “Hika thetse rawn ah zeihmanh a khohkhawh lonak hmun ahhin mah mi vialte ei awk rawl a za in zeitindah kan hmuhkhawh lai?” tiah an ti.

Cu hnu cun Jesuh nih, “Ei awk rawl zeizatdah nan ngeih rih?” tiah a hal hna. “Pawngmuk tlangsarih le nga hmetete pal lawng kan ngei,” tiah an leh. Cucaah mirun hna cu Vawlei i tthut awkah a fial hna. Cun pawngmuk tlangsarih le nga cu a lukhun i Pathian sin lunglawmhnak bia a chim hnu ah pawngmuk le nga cu a cheu dih hna. A zultu sinah rawl cu a pek hna i, mizapi kha an pek chin hna, mikip nih khim cikcek tein an ei. Cu hnu ah Jesuh a zultu hna nih an ei bang a hleimi rawl cu an char i Relsarih tiang a khat tein an char. A eitu hi pa lawngte thongli an si. Adang nu le hngakchia zong an rak um len rih. Cuhnu lawng ah Jesuh nih inn ah a tlunter hna, ti a si.