Innchungkhar dawtnak cu nuamhnak nganbik a si

 Innchungkhar dawtnak cu nuamhnak nganbik a si       

         Hla phuah thiam pa nih khuai bang lungrep ngeilo zuangzam nu tiah a phuah. Hosea 1:1, 2:4-5 chungah nu tthalo kong kan hmuh. A zei a si paoh ah nupi chia kong hi vun zoh ta rih usih. Amui zoh ah vancung ngaknu ko khi a lo. Thlapa lai caan i a vangmi Thlapa a lawh lengah ek le voih ngeilo ko khi a lomi, Nupi cu khuasak tintuk zeihmanh a ruat lo, eithawt lawng a duh, hnipuan ttha ttha le ttamhmoihnak rimhmui man sangsang lawng a duh. A fale cu hnipuan chiahru a hrukter hna, amah tu cu sattal ngai in innpa chakthlang a vak, mikong a va ceih, a va chuahpi mi tangka kha innchungkhorkhar ca ti umlo dawr ttha ttha ah a vah pi, khai supsap men le thil ttha ttha cawk in a hloh dih. A va umlo kar ah pa dang he an i chawktti i an vaktti. A vale chungkhat pawl kha zeirel loin a um hlei ah a va hringtu nu tiang hmanh kha a serhsat rih. Pathian lei ah kaa zuam a ti i, a innchungkhar kaltak in zan fatin hla ka cawng e, kaa pum e a ti. A fale cu Pathian nawl si te ko seh tiin a chiahtak hna.

          A fale pawl cu, fano tlai Arpi sahngar nih a seh i a taangmi Arfa tete bang,  inn a phanh ah a phunzai i a tlokciar peng. A va um caan ahcun Uico mi lawmh in a lawmh. A va pa cu a lungsi tuk i ka chungkhar zeidah an lawh ti zong a tuak kho ti lo. A nupi lawng a zohthla cang. Mah bantuk innchungkhar ah an fale mittha an chuak kho bal lo ti cu a fiang ko. Chin mi phun cu, unau, rualchan cingla he aa dawmi miphun kan si i kan nupi le nih kan unau rualchan cingla an kan dawtpiak lo ahcun, lohtlau kan si ko cang. “Nupi ttha nih Rual za hum, nupi chia nih Rualza pheng” timi phungthluk bia bang kan nupi le an chiat tuk ahcun rualchan cingla chimlo chuahtti unau tak tak hmanh nih an kan lengkai ti lo. Hlan chan ahcun hi bantuk nupi tthalo pawl hi cu, a hnichia le a samthih tiang putter in an mak tawn hna. A muidawh le a tungtai tthat, a awnem nih cun zei san a tlai ti lo.

          Nupi ttha vun zoh ta tuah usih. A hmaifang zoh cun cutluk dawh a si lo, a tungtai le a pumrua zong a ttha tuk a si lo. A mithmai vun zoh tikah, tthalpi tiva ko khi a lo, fim ringriang tein, a thinlung chungah ziar ngeihnak le nahchuah nak, hakkauhnak, pakhat hmanh a um lo lengah dawtnak thinlung he a khat i, zaangfahnak lungput zong a mithmai ah a cuang rih. A mi duh le a mi huat zong hngalh khawh a si lo, Tlangval kip nih keimah ko hi a ka duh khun rua, tiah an i ruah dih. Ruahnak ngei mi le a fim deuh mi tlangval pawl nih cun mah nu lawng kha tthal ti ko va sih tlanh bang an tlanh cio. Tlangval nih cun mah nu hi bia a chim ah aa dawhchin lengmang tiah an ceih.

          A nih i aa dawhnak cu lenglei dawhnak siloin chunglei dawtnak tu a rak si. Lenglei dawh cu chitkhat caankhat ca lawng a si i chunglei dawh cu a ziam kho lo, zungzal ca a si. Caan a sau deuh aa dawh chin lengmang. Va a ngei i fale a vun ngeih tikah cun, ka fale an rawl a ttam sual lai, an hnipuan a chiat tuk sual lai, hawi nundan thiam ve hna seh, tiah khua fakpi in a ruat. A zeilei paoh hi Pathian lawng rinh loin amah hrimhrim nih a cawnpiak hna. Zumhnak lawng hin san a tlai lo i, kan zumhnak le kan tuahnak fonhchih ahhin Pathian nih thlua a kan chuah lai. Amah Pathian lawng rinh ahcun a kan cohlang lai lo ti a hngalh caah amah ca nak in a fale caah le a innchungkhar caah a tuah zungzal. Ei le din zongah amah lawngin kau dukmak in zeitikhmanh ah a ei a ding lo. A innchung khar he nuam tein an ei tti peng.

          Dawtnak a ngeih mi hi a ka lawng siloin a langhter kho peng. Zeitik hmanh ah mithmai chia in a um bal lo i a thinhun zongah ka thinhun hi ka chungkhar nih hngal sual hna lai kaw tiin aa ralring peng. A vapa zong a upat tuk lengah a vapa sahlawh rualchan cingla zong kha amah chungkhat nak in a dawt deuh hna, a upat hna i a zaangfah hna. Kaa lawng siloin a tuahsernak in a langhter kho peng. A vapa zong nih a nupi tuahsernak a hmuh tikah a vun cawn ciamman ve i kaphnih lei in an i daw dih. Ngaichiat zongah, lawmh caan zongah hmunkhat tein, an chungkhat ning in an ttangtti. Nupi ttha nih Rualza Pum timi kha mah nu cung hin a tlung.

          A innchungkhar zoh tikah, zeithil an tuah paoh ah nuamhnak lawng a si ko. Hlaphuah tu pa nih “Innchungkhar dawtnak cu nuamhnak nganbik a si,… kan Bawipa Pathian zong lung a nuamhter” timi kha mah hna chungkhar hi an si ko. Minung kan nunchung ahhin kan Vawlei pumpi cu kan innchungkhar hi a si. Innchungkhar a nuamh lo ahcun khuazei kan kal hmanh ah kan i nuam kho ve lo, kan i nuamhbik hmanh ah caankhat te lawng a si lai. Innchungkhar a nuamh ahcun, kalnak kip ah mithmai a hngal i thinlung a nuam kho peng.  A nuam mi innchungkhar sertu “Nupi ttha” si i zuam cio hna usih. Nupi ttha a ngei mi Pa (va) vanttha si hna usih!