Innchungkhar in thawngttha thawknak a peh

 4. A biapi bikmi Nawlbia.

     Nikhat ah, Judah biaknak a biami Farasi hruaitu a cheu nih a chimmi i palh seh tiah an leirawi hnik. Moses phung a cawngmi an lakah pa pakhat a um. Jesuh kha a thawh i, “Cawnpiaktu, phungbia cauk chungah a khoi hi dah a biapi bik nawlbia a si,” tiah a hal. Jesuh nih hitihin a leh. “A biapi bik nawlbia cu hihi a si. Na Bawipa na Pathian cu na lungthin dihlak, na thlarau dihlak le na ruahnak dihlak in na dawt lai. A dang a biapi bik rih mi nawlbia cu a pakhat bantuk hin a si ve. Hihi a si. “Miding kha nangmah lila naa dawt bantuk tein na dawt hna lai.” Moses phungbia vialte le a hlan chan i Pathian can ah bia a rak chim tawn mi profet an cawnpiaknak a sullam taktak hna cu mah nawlbia pahnih chungah hin hmuhkhawh dih an si, tiah a ti hna.

5. Na Ral kha va daw hna.

     Nikhat ah, Jesuh nih a cawnpiak mi hna cu, hitihin a si. “Moses phungbia cawnpiak tu a cheu nih hitihin an in cawnpiak hna. “Na hawikom na dawt hna lai i na ral kha na huat hna lai” an in ti hna. Kei tu nih cun hitihin kan ti hna. “Na ral kha va daw hna. Na cungah tthatlonak a tuahmi hna caah thla va cam.” Hi bantuk lawngin vancung a ummi nan Pa Pathian bantuk nan si kho lai. Mittha le michia cungah aa khat tein ni a tlanter. Tthatnak a tuahmi cung le chiatnak a tuahmi cung zongah ruah a surter.

     An daw mi lawng na dawt ve hna ahcun zeicahdah Pathian nih laksawng an pek chanh lai. Mittha lo tiah na ruah mi ngunkhuai khawltu hna hmanh nih pei an tuah ve ko cu. Na hawikom cia men lawng na chawnh hna ahcun zei khua-ruahharnak dah a si? Pathian a thei lomi lawki mi hna hmanh nih an tuah ve ko lo mei!

     Vancung i a ummi nan Pa Pathian nih cun mikip te a dawt hna, cucaah nan nih zong mikip te nan dawt ve hna lai, tiah a cawnpiak hna.

6. Jesuh nih a zultu hmasa bik a kawh hna.

     Nikhat cu Galilee rili kam ah Jesuh a dir. Pathian bia a cawnpiak mi hna kha theih awkah mi a tampi nih amah kha heh tiah an naih. Khika ah a ummi Simon lawng cungah Jesuh cu a lut i, Tili kam in na lawng cu tlawmte tthial tuah tiah Simon kha a fial. Tilawng cungah a tthu i mirun kha a cawnpiak hna. A cawnpiaknak a dih tikah Jesuh nih Simon kha, “Ti a thuh deuhnak hmun ah na lawng kalter tuah, na hawile he nan sur chep in nga nan tlaih khawhnak hmun ah tthial tuah,” tiah a ti.

     Simon nih, “Saya pa, zan khuadei te nga tlaih awkah heh tiah kan ttang tual-mal nain zeitehmanh kan tlai lo. Sihmanhsehlaw, ti ko uh na ti ahcun kan sur cu kan chehtthan ko lai,” tiah a leh. An sur cu an cheh tthan i nga tamtuk an tlaih caah an sur tiang tleh dih aa zal. An hawile kha rak kan bawm u, tiah an auh hna.

     Cucaah an hawile cu lawng dang in an ra i an lawng pahnih in nga a khat tein an rawn caah an tilawng cu ti chungah an pil dengmang. A cangmi thil vialte kha Simon Peter nih a hmuh tikah Jesuh hmai ah a khuk aa bik i a biak. Peter nih Jesuh cu “Kei cu misual ka si! Keimah lawng dai tein ka kaltak ko,” tiah a nawl.

     Hitihin a chimnak cu nga tamtuk an tlaih caah a hawile he an khuaruah a har tuk caah a si. Jesuh nih Simon cu, “Ttih duh hlah! Nihin thawkin a ka zultu si awkah mi tu na tlaih cang hna lai, ti hmuhternak hmelchunhnak a si,” tiah a ti. Cuhnu cun Simon le a hawile nih an lawng cu tili kam ah an kalpi. An ngatlaih rian kha an kaltak i Jesuh hnu kha an zulh colh.

7. Jesuh nih Mithipa a nunter.

     Voikhat ah Nain timi khua ah Jesuh a phan. A hnu zultu le a dang mi tam nawn zong a sin ah an kal ve. An khua hauka hram Jesuh a phanh ka te ah mithi pakhat an i zawn i an rak chuah duahmah kha a hmuh hna. Mithi kha va vui awk ah an kalpi lio a si. Mithi cu nuhmei nu i a ngeihchunh fapa pakhat a rak si. Mi tampi nih ruak kha an thlah. Jesuh nih minu a hmuh tikah a zaang a fak tuk i “Ttap hlah!” tiah a ti. A hei fuh hna i mithi pa an i zawnhnak ruakkuang kha a tongh. Ruakkuang a pu mi hna kha an dir i mithi pa kha Jesuh nih “Tlangval, tho tuah” tiah a ti.

     Mithi pa kha a nungtthan, a hung tthu i holh hram a thawk. Jesuh nih a nu sin ah khan a pek. Mikip an therphang dih. Pathian kha an thangtthat. Pathian sin in a lianngan mipa a phan! Pathian nih a miphun a bawmh cang hna lai, an ti. Jesuh nih a tuahmi thawngpang cu ramchung khuazakip ah a phan. An pawngkam ram vialte zong a cul dih ti a si.

     Tutan cu hi vial in si rih sehlaw caan kan ngeih tikah kan pehtthan te lai. Hi tuanbia hna a thei mi paoh cungah Pathian laksawng co ko uh.