Nu Le Pa Nih Fale He Pehtlaih In Ttuanvo Hna

DAL (2) NAK 

Nu le pa nih fale he pehtlaih in ttuanvo hna.

Chuahkeh karhternak ttuanvo.

     Chungkhar ngei hna nih a biapi bikmi ttuanvo pakhat cu fanu/pa laksawng hmuh le annih kha zohkhenh ding rian a si. Pathian pekmi fanu/fapa laksawng hna kha cohlang in kan tthanter lai. Cipeh karhternak kha a rakchanh mi tuahsernak paohpaoh cu phungning an si lo. Fapawi khamhnak, fahrawhnak hna cu a nganmi sualnak an si. Pathian khuakhannak a simi tefa tampi in ngei ulaw, pungzam u (Gen 1:28) ah a timi timhtuahnak kha a ralchanhmi a si. 

Innchungkhar le fapawi khamhnak.

     Mikip nih hin ahohmanh nih hrawh khawh lomi chuahpi mi (kokek) minung nawlngeihnak tinvo kan ngei dih. Cu nawlngeihnak tinvo hna ah "Minung nunnak nawl" hi a biapi bikmi a hrampi a si. Minung nunnak nawl kha minung a simi vialte nih upat awk a si. "Zeicahtiah minung nunnak cu a sungtuk caah a si. Minung cu Pathian nunnak he aa lomi kan si (Gen 1:27). Cucaah a sunglawi tukmi minung nunnak kha thah ding a si lo." (Exo 20:13)

     Minung kan ti tikah titsa muisam thleidan lo, a rum sifak a dot thleidannak um lo, nupa thleidan lo, vawleicung i a ummi minung dihlak hlei ah hrin rih lomi (pawi liomi) ngakchia zong an i tel dih. Cucaah Bupi i Canan upadi, C.1398 ahcun 'Ngakchia note paoh nih hrin i nunnak nawl an ngeih dih' tiah fiang tein a langhter.

     1994 kum, October thla ah Vawleicung fapawi khamhnak meeting kha Pope John Paul II nih ralrin pekin a chimmi cu, "Fa a pawi hramthawk tein amah i, minung pakhat sive nak nawl, minung covo le a dang nawlngeihnak hna kha a fehter lai. Cu nawlngeihnak hna lakah ahohmanh nih a hrawhkhawh lomi ngakchia note nunnak nawl zong aa tel ve. Cozah lei nih minung pakhat cio tinvo, nawlngeihnak kha humhimnak le tthanchonak um dingin a tthabik lam in tuah ding ttuanvo a ngei. Mi pakhat cu zalong tein thimnak nawl, konglam langhternak le minung covo (nunnak nawl) kha ralchanh in tuahkhawh a si lo. A nungmi sinak nawl kha upatnak cu luat tein umnak nawl telh in, a dang nawlngeihnak vialte a hrampi a si," tiah fiang tein a rak chim.

     Pope John Paul II chimnak bangin mikip i kokek minung covo cu "A nungmi sinak nawl" kha a si ko. A nungmi sinak nawl a um ti lo ahcun a dang nawlngeihnak hna cu sullam a ngei ti lai lo. Cucaah a nungmi sinak nawl kha mikip nih kan tlaihchan cionak a si. Amah caah hrin rih lomi, sualnak ngeilo ngakchia note hna i a nungmi sinak nawl kha upat in mansung ah nan chiah lai. Mah nih zalong tein i thimnak ruangah sual ngeilo ngakchia note hna an nunnak an sungh cu hruhhrang mi mithat lainawn a si ti kha philhawk a si lo." 

     Voihnihnak Vatican pumhnak nih cun fapawi hrawhnak le ngakchia note hna thahnak cu chimkhawh lo tiangin a nganmi sual nganpi a si, tiah a ti.