Nu le Va "Dinfelnak"

Catholic Bupi ah aa thi-um mi nu le va hna cu (thisa khat) pumkhat an si(Gen; 2:24). Nu le va a si mi hna nih chungkharkongah, a bimi ruahnak "Keimah" timi biafang hi hman awk a si ti lo.

Nu le va a si mi nih chungkhar kongah "nangmah tuanvo, keimah tuanvo; nangmah rian, keimah rian; nangmah kongkau, keimah kongkau; nangmah thil, keimah thil" tiin i thleidan khawh a si ti lo. "Kanmah rian, kanmah tuanvo, kanmah kongkau, kanmah thilri, kanmah chungkhar timi hngalhthiamnak le cohlannakthiamnak chiah ding a si. "Keimah" timi ruahnak siloin, kanmah timi ruahnak hi chiah a herh.

"Kannih innchungkhar" timi biafang hman cu zapi he aa pehtlai mi si nak kha a langhter. An pahnih in chungkhar tuanvo(chungkhar caah tuanvo rian ngan) kha lak ding a si. Innchungkhar rian cu kan mah rian a si, timi lungthin ngeih a hau. Tuanvo tlolhnak, lungduhlonak langhter lengmang cu chungkhar hrawh bantuk a si. Keimah timi lungthin a ngei mi cu amah duh herhmi, amah lungdiriamnak, amah nuamhnak lawng kha papekin a tuah i a biapi ah a chiah tawn. Midang duhherhmi, midang ruahnak, midang lungtlinnak tuah kha zei ah a rel tawn lo. Hmaikal i a tuan tu si nak in, midang rian fial ding lawng kha an duh deuh.

Nu le va hna nih "keimah" timi lungput an ngeih chung paoh cu pakhat le pakhat an i "Daw" taktak kho lai lo. Zeicah kan ti a si ah cun midang kha thilri pakhat bantukin an hmuh hna caah a si. Nu le va sinak in nun cu chungkhar caah aa tluk tein riantuan ti le i zohkhenh ding a si. Nupi le lawng asilo ah va le lawng kha  rian tuan tu ding menmen ah ruah cu ngaihchiat awk ngaingai a si.

Keimah timi lungthin a ngeimi hna cu chungkhar riannak in amah duh mi, amah nuamhnak le lungtlinnak lawng kha papekin an tuah tawn.

Chungkhar pakhat ah keimah timi lungthin nih a hruai hna chung paohpaoh cu i sikvelhnak, tuanvo tolhnak le har tonnak hna lawng kha a chuahter i a donghnak ahcun chungkhar ah buaibainak(nu le va) then nak tiang a phanhter tawn. Keimah ti mi lung put kan ngeih chung paoh cu, innchungkhar tha pakhat kan ser kho lai lo. Keimah ti duhnak thinlung cu duhdawtnak a zotertu le chungkhar rawhralnak hrampi pakhat a si. Mah zawn lawng aa ruat mi hna sining he pehtlai in Mithiang Paul nih a ti mi cu:"Minung  sining nih a tuah tawnmi cu a fiang ko: nu le pa sualnak tehna, a thurhnawmmi thil tehna, aa dawhca lomi thil tehna, siasal biak tehna le dawih le eih tehna hi an si. Pakhat le pakhat an i ra, an i do, an i nah chuah, an thin a hung anmah zawn cio lawng an ruat, an i then, ziar an i ngeih, zu an ri, an au an khuang i cu bantuk thil a dang tampi kha an tuah lengmah hna(Gal 4:19-21).