Pakhat le Pakhat Asining tein Cohlannak

Pakhat le Pakhat Asining tein Cohlannak

Chungkhar kongah pa le nu cu pakhat le pakhat kha asining tein cohlan piakawk a si. Minung pakhat cio chambaunak le tikhawhnak a pahnih ning tein theihthiam cohlan awk a si lai. Ahohmanh sualnak ngei lomi an si lo. Hi vawlei ah a sual lomi pakhat hmanh an um lo. Minung timi cu a palhkho mi, thazaang a dermi thilnung, a ttha le a chia a ngeimi thilnung an si ko lo maw? Aa tthi-um dingmi mopa le monu hna cu pakhat le pakhat luantuk in i ruahchan ding a si lo. Luantuk in saangpi ah ruah ding zong a herh lo.

Dawtmi kha luantuk in saangpi ah na ruah (chiah) ahcun, luantuk in naa ruahchan ahcun kuttongh nunnak ah mah ruahnak bantukin a rak si lo tikah ngaihchia in an lung a rawkttheo tawn. Pakhat le pakhat asining tein chambaunak le tikhawhnak kha theihpiak in cohlan i, komhnak thawngin nuam tein kuttlaih an umtti kho lai. Pakhat le pakhat asining tein cohlan i komhnak ah pakhat tahnak (pedan) in a dang pakhat kha tah lo ding, a biapi in ralrin ding a si. Keimah ka tuahkhawh tlukin na tuah-khawh ve lai. Keimah kan dawt tlukin na ka dawt khawh ve lai tiin rumro in halchih ding a si lo. Hi bantuk na hal ahcun nangmah cu amah kha nangmah tahfung le cohlan hawikomhnak menmen a si. Amah tahfung in cohlan komhnak a si lo caah asining tein komhnak a si ti lo. Kokek ning a si ti lo. Minung pakhat le pakhat nunnak tahfung aa khat kho lai lo.

Nangmah cu nangmah na si ko i, amah cu amah a si ko. Cucaah nangmah tahfung le amah tahfung cu aa khat kho bak lai lo. Pakhat le pakhat aa khat tein a si kho lai lo. Cuti a si kho lomi kha rumro in aa khat tein siternak nih pehtlaihnak kha a hnursuan khawh caah ralrin a hau. Pakhat le pakhat asining tein cohlan i, theihthiam le ngaihthiam in dawtkhawh lawngah chungkhar kong cu a nuam i a dai lai.

Na dawtmi intuarnak, na dawtmi duhnak, na dawtmi a chim duhnak zong kha upat tein na ngaihpiak lai. Nangmah cu biachiamthiam mi lawng na si i, a ngaithiamtu na si lo ahcun nangmah lawng nih na chim i, na dawtmi chimnak caanttha na pek ve lo ahcun pakhat le pakhat i theihthiamnak a zortertu, amah intuarnak, amah hmuhnak hna kha asining tein a langhchuah duhnak lungthin kha a hrawktu sinak phunkhat a si. Cutikah nangmah cu na dawtmi lungduh saduhthahnak hna kha asining tein theihhngalh khawhnak na sungh a si. Zawnruahnak a ngeilo mi pakhat ah nangmah cu an hmuhkhawh men. Upatnak zong na sung rih lai.