Sual Tthatlo Theihfiannak A Tlau Chinchin

Chungkhar

Sual tthatlo theihfiannak a tlau chinchin

     Nihin chantiluan ahhin mi tampi nih sual kha sualnak ah an hmu ti lo. A ttha lomi kha a tthalo ah an hmu ti lo. Nauhrawhnak kha a sual ah an ruat ti lo. Minung cu zalong tein biachahnak nawl a ngei, tiah an aupi i vawleicung kip ah nauhrawh nak kha rawlei, tidin tluk fawi tein an tuahmi kha ngaihchiat awk ngaingai in kan hmuh. Vawleicung ahhin nifa tein sual ngeilo ngakchia note tampi a thongsang in nauhrawhnak in an thihter hna. Nauhrawhnak cu ttih awk taktak a simi tthatlonak tuah pakhat a si. Mah pum i khamhkhawhnak thazaang a ngei rih lomi sual ngeilo, hrinhniang hna kha hruhhrang in namnehnak zong a si fawn. 

     "Hrin rih lomi ngakchia note hna nawlngeihnak zei ah a rel lomi hna cu minung nunphungpi kha siivai a paihmi an si i, sertu Pathian tthawnnak huham kha a serhsat mi an si," tiah a ti. Cu bangin Bishop Maffi nih a timi cu; "Nihin vawleipi hi tthatlonak in a khatmi vawleipi a si lawng siloin cunak ngaihchiat awk a si rih mi cu Pathian le Sualnak (chiatnak) kha zeihmanh ah a hngal ti lomi vawlei a si cang," tiah a ti. 

     A hmaan ko. Zeithil hidah a sual i zeithil hidah a sual lomi a si, tiah theihhngalhnak a lotlau mi hi a tthalo tuk hringhran. Phe kahnak, a tthalo nuamhnak phunphun tuahnak, nauhrawhnak, a dinglo tangka kawlnak te hna kha mi tampi nih sual ah an hmu ti lo. Zeirel lo dai tein an tuahcio mi kha kan hmuhkhawh hna. Cu ruangah Pope Pius VII nih, "Minung nunnak ah sualnak sullam a lohnak hramthawk cu vawleicung ah sualnganbik a si kho," tiah a rak thanh. "Minung tampi hmai ah ziaza tthat fimnak, van ngeih awkah fakpi in i zuammi nakin hruhhrannak hna kha tamdeuh hmuh a si cang," tiah a rak ruah. Minung hna cu tthathnemnak, nuamhnak le a hmaan mi hna kha ningcang lo piin an kawl cio cang. Tu chanthar ah, "A hmaanmi thil hna a silomi hmun hna ah an kawl cio," tiah Maritin nih cun a ruah. 

     Nauhrawhnak, fahrin phihnak in zalonnak le nunnuamhnak kan ngei deuh lai, tiah an ruah palh. A hnubik ahcun sualthurnak thladem tangah taksa lei, thinlung lei, thlarau lei hna ah a zorchin lengmang i rawhnak he lawng an pah cuahmah hna. "Nan lo ko cang! Thilttha kha thilttha lo nan ti i, thilttha lo cu thilttha nan ti," (Isaiah 5:20).

Add new comment

6 + 4 =