Milu karhnak le kokek pawngkam nih tonmi harnak hna

Vawlei cung huap, tahnak aa khahlonak (a peh)

Sifakmi hna harnak piahtana kha fianter hnu, vawlei pumpi aa thleng i, umnak a ttha deuhmi hmun sinak ah ser dingin ceihkhan awk asinain, cheukhat nih fapawi khamnak sii kha hmang in, milu karhnak kha rikhiah piak dingin ruahnak a chuahpi mi zong an um. A caancaan ah ramdang in a tthangcho kaa mi bawmhchanhnak an pek tikah milu hrinmi rikhiahnak zulhawk phungphai (policy) in an ttem hna i, ramkip phu hna in norchih rianttuan ternak zong an ton.

Milu a tam i hmankhawh mi vawlei chungchuak thilri a tlawm tikah tthanchonak le vawlei chungchuak thilri hna zatceo hman awk harnak an tonnnak kong hmuhsaknak cu a hman awk tlukin a hman ve ko nain, minung kakip tthanchonak le a ummi zat vawlei chungchuak thilri hna kha khat le khat zaangfah zawnruahnak langhter in tthencheuh hmannak ningcang a tthancho ahcun, milu karhnak kongkau kha ttha tein tlangtlak fianter khawh a si lai nak kha kan theihfiang ko lai.

Mi cheukhat hna cu mitlawm deuh tthathnemnak ca lawngah vawlei chungchuak thilri chiahru ngaiin an hmannak cungah sualphawt loin, minung milu karhnak cung lawng, sualnak an ponchuahmi piahtana cu mithmuh kuttongh in tlangtlak fianter awkah an almi a si kan tikhawh. Hiti ka chimnak cu tulio kan hmanmi phawtzamhnak ningcang kha tuaktan piak le khamhpiaknak in ka chimmi a si. Hi ningcang ah vawlei chungchuak thilri hna cu mi vialte caah aa tluk tein hmankhawh a si lonak, cucu mitlawm deuh phu hna i tinvo a sinak, vawlei chungchuak thilri kha mikip nih an rak hman a si ahcun cu an hmannak in an hlonhmi thilri hna caah vawlei pumpi hmanh nih aa tlum lai lo tiin ngaihthiam halnak phun in an chim tawn.

Cu hlei ah, kan rak theihcia mi bantukin minung caah hmuhkhawh dingmi eiawk rawl, cheuthum cheukhat tluk kha nifate mi nih an hlonh tawn i eiawk a ngei lomi, sifak mi hna caah hi bantukin hlonhnak cu misifak hna rawldum ttinak puai in an firmi bantuk a si. Pehzulh tein ramchung ah le vawlei pumpi tahnak in minung milu a chah aa khahlonak zong kha cinken awk a si rih. Minung milu a karhnak ruangah hmun pakhat chung i, hmankhatte ah thilri hmannak a san deuh tikah cun hmunchung i thil umtu ningcang hna kha hnokcencun in a umter khawh. A hnu pehzulh ah kokek pawngkam thurhnawmhnak he hmunkhat in, kuatphawrh rianttuannak, hlonhmi thilri kongkau tlangtlak fianternak, vawlei chungchuak thilri hna a zornak le zatlang nunning a ttumchuknak hna kha pehzulh in ton cuahmah a si lai.