Na nu ka mitthli a tla!

Na nu ka mitthli a tla!

Ka fa le hna, . . .

Na nu lungchung i fahnak ka in mi le lungrethei in ka um nak caan a sautuk cang i ka fa le sinah ka van in chim ta hna lai.
Ka fa le nan theih cia cang bangin zeizong vialte ser ka an rak si lio ah cun aa rak i dawh tuk hringhran; Sertu kutneh hna zohtik ah khuaruahhar zong an rak um tuk fawn.
Nan nu dawtnak tangah va te te hna zong an rak i nuam, ti va te te zong dai tein an luang hna. Tlangthluan si hna seh, nelrawn um nak vialte hna zongah lawmhnak in a rak khat.

Khua caan ning cang tein a si khawh zungzal nak hnga kei mah hrimhrim zong nih thlennak ka rak tuah peng. Nan dawp mi thlizi si hna seh, nan ei mi thingthei si hna seh, nan din mi ti siseh, zeihmah herhbaunak a rak um lo.
Hi vialte hna hi ka dawtmi ka fa le ca lawngah an si ko hna. Kokek pakhat khat a si sual ah cun kei mah hrimhrim nih a kih lum nak ning cang tein a um khawh nak hnga ka rak in khamh tawn hna.
Biatak in ka chim a si ah cun, nan caah ka rak tuah mi thil hna hi chim cawk lo an si. Hi konglam kan chimh hna zong hi keimah le keimah  cawisan duh ruangah a si lo.
Ka fa le hna nih theithiam hna seh ti duhnak lungput in kan chimh mi hna a si ko. A dongh tiang ka chim a si ah cun nan pawng kal nan zun zun tiang in ka rak in zohkhenh dih hna a si lo maw?

Cu tluk in ka rak in dawt ko hna. Sihmanhsehlaw, ka fa le nih nan nu dawtnak hi nan ka theithiam loh. Ka chim mi hna zong zei ah nan rel duh lo.
Zohkhenh tthan ding ti rih hlah uh, nan ka hawt tak ko cang hih. Kei zong ka tar ve cang. Zawtnak hna zong tamtuk ka in cang ruangah ka celh ve ti lo. A tar cang mi kei mah hi chikhat te cu rak ka zoh ta ve hmanh uh.
Thingram hna he a khat mi tlang hna zong kan pek hna a si lo maw? Zei ruangah dah thingram hna zong nan cin tthan ve ti hna lo.
Sertu nih a rak kan tuah to ning hlawt in zei ruangah dah thil thar lawng kawl le ser ve nan i timh? Nan mah ruangah tiva chung um nga si hna seh an thi an lo cang hna hih. Rili pi pi hna zong sivai tha lo in an khat dih cang hih.
Zeizong vialte hi zohchia in an um dih cang. Thil chuah duh ah sehzung tamtuk hringhran nan dirh fawn hna i cu sehzung in a chuak mi thlichia hna nih ka thaw zong an ka ip ter cang.
Nan ngeih chawva hna zong pakhat le pakhat i phawtzamh duh loin nan um hna. A rum mi nih an thil chiah nak hmanh tlum lo in an rum, a si a fak mi hna nih ei awk hmanh an ngei hna lo.

Pawngkam thli hna zong an thiang ti lo. Sifah harsat nak lawng te an si cang. Kokek ral phunphun an hung chuak. Zawtnak tha lo phunphun ruangah harsa in a um mi chungkhar hna zong rel cawk lo an si cang.
Ka rak in dawt mi hna cu hi ti hin maw fahnak pek in nan ka cham tthan peng ko lai. Zangfah kan nawl ko hna. Hitin cun lehrul ka cham sawh hlah uh! Ka mitthli nan ka hnawh piak lo zongah a poi lo.
Fahnak cu ka pe ti hlah uh mu. Nan nu ka si bangin nan i dor nak zong ka si zungzal ko lai. Zeiruangah dah nan mah um nak a si mi inn cu hrawh nan i timh peng ko rih.  Kan nawl ko hna.
Rak ka zohkhenh pah ve cang ko uh. Ka fa le hna harsatnak nan ton ding hi cu ka tuar kho hrimhrim lai lo. A hmuh zong hmuh ka duh lo. Thil tha lo nan ton hnga ding zong theih ka duh lo.
Ka lungre a thei tuk cang ee ka fa le hna aw.

A donghnak ah biacah kan duh mi hna hi tha tein rak ngai uh mu. U nau dawtnak lungthin ngeih buin nan um nak vawlei pi hi zohkhenh zungzal uh.
Nuam te le him tein nan um lawng theih ka duh, hmuh ka duh. Ka fa le hna kan dawt tuk hringhran hna ee.

Hi vawlei Pa Pathian nih a kan pek nak sullam cu zohkhenh dingin a si. Pakhat le pakhat rualrem te le ning cang tein a um zungzal nak hnga a si. Nan zohkhenh lo a si ah cun sualnak tuah a si ko.
Pathian pek mi kutneh hna hi a mui chiatter lo in aa dawh chinchin khawh nak hnga i tim zungzal uh.

Add new comment

8 + 2 =