Mithiang Anselm

Apirl, 21

ST. ANSELM (Bishop le Bible thiamsang)

(1033-1109)

            Conterbury khua Bishop a simi mithiang St. Anselm cu 1033 kum, Italy ram, Aosta khua i phunsang chungkhar in a chuak. Kum (27) a si tikah Normandy khua, Bec ah a ummi, St. Benedict Zateih bu ah a rak lut. Cu Zateih Sianginn khan ah kumthum khengte thlacamnak in thazaang a lak hnu ah Caen khua Zateih Sianguktu ah an rak thim. Zateih dang hna nih amah cu Sianguk siding ah a kum a notuk rih i an lung silo i Anselm nih a lungsaunak le zaangfah thiamnak in a rak uk khawh hna. Amah cu ngakchia cawnpiaknak ah a thluak a `tha ngai. Ca cawnpiaknak ah teinak hmuhlo ruangah a lung aa ruam lo ngaimi a innpa Sianguk Zateih pakhat kha, “Na dum chungah hin thingkung cing law a pawngkam in na tlaihkhih dih ahcun zeitin dah a nge le a `te an chuah lai,” zeibantuk kung ah dah aa chuah lai. “Nangmah zong cubantuk cun na si, cuticun na Siangngakchia kha na uk hna. Luatnak le lawmhnak na tuahpiak hna lo; Na `thihphaih lengmang hna cu ta,” tiah a ti.

            Khuaruah thiamnak lei hmasabik a simi Anselm cu, an chan lioah minthangbik Bible thiamsang a rak si. Ca lei zongah Pa a rak si. Mah lawngin biachimnak (morologue) timi cauk ah, Pathian cu a sangbik (cungnungbik) a si caah, Pathian Sining kha rak chekhlat i, “Biahmai`thi” (prologue) timi cauk tu ahcun Pathian a umnak kong kha a min a thangmi dirkamhnak in a rak langhter. 1093 kum ah Canterbury khua Bishop a simi Bishop Lanfrance hmunhma ah rolh (`tuan) dingin an rak auh. Culio caan cu Bupi zalonnak caah Siangpahrang he fakpi in an i doh lio caan a si caah Alsem cu atu le atu ramchungin `thawlnak a rak ing. Mipi an i lawmh lio caan, 1106 kum ah Canterbury khua ah a rak kir hnu kum (3) ah a rak thi.