Mithiang Paul Lungthlennak

January, 25

ST. PAUL LUNGTHLENNAK (+64)

(LAMKALTU)

            Biaknak dang (Gentile mi) hna lamkaltu Paul cu Turkey ram, Tarsue khua ah Judah phung aa tlaih mi nu le pa nih an rak hrin. Amah Rome mi sinak in an hrinmi a si. Fimnak rumdeuh dingah Jerusalem khua i an hun mi Camiliel Sianginn ah a kai i rengh ngaimi Farasi hna upadi kilvennak tangah fimnak a rak cawng. Judah mi upadi ah a lung a `thawntuk caah St. Steven kha lung in an cheh i an thahlio ah khan a bawmh hna i Khrihfa hna hremnak an tuah i ahmaan lomi zumtu bu pakhat si awk an tuah lio zongah a rak i tel ve. Cubantuk rianhna `tuanawk ah Tlangbawingan hna nih `tuanvo an rak pek caah Damascus khua i Khrihfa hna kha va tlaih in Jerusalem lei rak hruai ding ah Saul cu a rak kal.

            Damascus a phak laite chun laicer ah, vancung in ceunak pakhat cu ruahlo piin a rak cerh i vawlei ah a tlu. Cun awthawng pakhat a theih mi cu “Saul, Saul zeicahdah na ka hrem?” tiah a ti i Saul nih “Bawipa, ahodah na si?” tiah a hal ve. Aw nih cun, “Keimah cu na hrem lio mi Jesuh ka si” Atu bakah “Tho law, khuachungah va lut tuah. Zeidah na tuah lai timi kha kan chim lai” (Lam; 9:4-6) tiah a leh. Saul he a rak kal `timi hna cu holh kho lo in an dir hna. Annih nih awthawng kha an theih ko nain zeihmanh an hmu lo. Saul a dirlio ah a mit pahnih cu zeihmanh khua a hmuhlo caah a hawile nihcun khua chungtiang an hruai. Nithum a rauh hnu ah Ananisa timi pa cu innchung ah a rak lut i a lu cungah a kut a chuan hnu ah “Ka nau pa Saul, Bawipa Jesuh nih nangmah mithmuh `thanding in le Thiang Thlarau he na khatnak ding caah keimah kha a ka thlah” tiah a ti. Cu hnu ah Saul (Paul) cu tipilnak a ing i Lamkaltu ngan pakhat ah a cang.