Paola Khua in Mithiang Francis

April, 2
ST. FRANCIS OF PAOLA (1416-1507)
(RAMLAK UM ZATEIH)
A hmebik Tlangbawi bawmtu (Minim Friars) bu a rak dirh hmasabik tu St. Francis cu 1416 kum ah, Italy ram, Paola khua ah a chuak. Kum saupi tiang fa ngei kho lo in a ummi nuva pahnih cu St. Francis Assisi nih thla a campiak hna nak thawngin fapa te an rak ngeih khawh caah an fapa min kha “Francis” an rak sak. Francis cu kum (16) a siin rili kam lungkua pakhat ah ramlak um Zateih pakhat sinak in biatak i zuamhram a rak thawk. A thianhlimnak le Pathian le upadi a upatnak thawngin mitampi nih a hnu an rak zulh i hmasabik “A hmebik mi tlangbawi bawmtu bu” kha a rak ser thawk. Cu min aa thimnak cu annih kha an Pathian bu chungah a hmebik tiah kan cohlang seh tinak caah a si.
Annih cu a khuh le vampang a um lomi vawlei cungah an it i sa ulh rawlulh in sikaan a har ngaimi kha an zulh. St. Francis nih “Ka u le ka nau hna, nunnak ngei vawlei kannih hna cu thlarau lei ah i zohkhenh cio ding in ralrinnak kan pek hna; Thihnak timi cu a fiangmi a si, a hohmanh nih hrialkhawh lomi a si. Minung kan nunnak cu a tawituk i meikhu bantukin duhsah tein an lo thluamah lai,” tiah a hnu zul hna kha a rak chimh hna.
1481 kum ah St. Francis cu thi dengmang in a zawmi Luis Siangpahrang (12) nak nih a nawl caah France ram ah a rak kal. St. Francis nih Pathian kha, “Pathian bawi hna i an nunnak hmanh kha rikhiah a si i, zungzal hmunmi Pathian lawng nih cu nunnak hna kha a ngei,” tiah a rak ti. Siangpahrang Louis cu a zawtnak a dam lo hmanhah Pathian `ang chungah daitein thih a herhnak kong kha Francis sin in a rak hngalh. Siangpahrang Louis rocotu Siangpahrang Charles (8) nih St. Francis kha a mah ruahnak petu rian a khinh i France le Italy ram hna ah Zateih Sianginn hna a rak sakpiak. Paola khuami St. Francis cu 1507 kum ah a rak thi.
Photo:credit to original owner