Pawngkam

Kokek Pawngkam 

Pehzulh tein pawngkam kokek he pehtlaih in a palh i a lenglang lawng langhter in khuaruat mi tulio caan thil umtu ningcang ah a lung a tlingmi zeitehmanh kha zeiah rel loin, mah he zeihmanh aa pehtlaih lo ti phun in nuam tein a ummi hna an karhchinnak hna zong kan hmuh.
    Harnak piahtana nganpi a chuak hnu ah ralṭha in a dikmi biachahnak tuah awk a herh caan hna ah asi tawn ningkel in asi ṭheo bantukin kannih cu tulio a canglio mi umtu ningcang ah kan caah tling cikcek in fianternak a umrih lonak kong chimduhnak hna a chuak lai.
    A lenglang lawngin khuaruat mi hna caah kokek pawngkam thurhnawmnak le rawhnak kong, hmelchunhnak tlawmte asimi hlei in harnak piahtana chiahru ngaiin asilonak kong, vawlei pumpi cu a luancia kum tampi lio zongah hi piahtana hna karlak ah a rak dir bantukin pehzulh in a dirte lainak kong kha an chimcio mi asi.
    Hi bantukin harnak piahtana kha dairek in fianternak umlo in samfa tia te hrialnak cu tulio ṭhutdir umtuning tulio thil chuahternak ahmaan ning tahnak pungsan hna kha thleng loin hlan san tukin pehzulhin um le rianṭuan cio dingah nawlpeknak laisen hmuh bantuk asi.
    Cuticun mi hna cu “mah thlankhor mahte cawh” an ti bantukin mahcio rawhnak ah a norter mi a ṭhalo ziaza hna kha saupi nguhter dingah khuakhan lairel in rian an ṭuancio. Annih cu harnak piahtana kha i hmuhter loin, piahtana harnak tonmi kha cohlang loin zeihmanh asite lai lo, tiah i titer in thawng an zamh cio i caan tanh in a biapi mi biachahnak an tuah i rianṭuan awk a tlak mi thil hna kha tuah ṭuan awk an rian an tlolh.