SUAL THLAHNAK KONGAH

Protestant Bupi hna nih Pathian nih amah min in sual ngaihthiamnak nawl a pek hna ti kha an pom lo.

Catholic Bupi ah Lamkaltu an nawl ngeihnak a comi Bishop le Siangbawi hna nih Jesuh Khrih min in a sualnak aa ngaichiahmi hna kha an sualnak an thlah piak hna. Jesuh nih a Khrihfa bu caah rian a khinh mi hna cu an kaa lawngin siloin, amah aiawhtu an si caah nawl ngeihnak zong a pek chih hna. John 20: 23 ah “Mi kha an sualnak nan ngaihthiam hna awk a si” a ti hna. Cun Mt 18:18 ah “Vawlei cungah nan khapmi thil poah cu Vancung zongah khap an si ve lai i, Vawleicung i nan onh mi poah cu Vancung zongah onh an si ve lai,” tiah a ti `han rih hna. Khrih a Bupi cu Lamkaltu hna chantiang ca lawng a si lo caah Jesuh pektak mi sualngaihthiamnak nawl zong cu anmah a chaangtu hna sinah pek chin an si lai ti cu a fiang ko.

Mizaw zualcei nih sualphuan a duh nain tlangbawi a um lo ahcun Pathian sinah direct a phuan lai. A dam `han hnu ahcun tlangbawi sinah a phuan `han `hiam`hiam lai. Thinghmui zawtnak in damter a simi pa kha Jesuh he an i tong caah, Jesuh nih keimah he kan i tong cang ko i, a zaa ko, va kir ko cang a ti lo khah. Tlangbawi sinah va kal law na dam le damlo rak in zoh seh a ti. (Mt; 8:1-4)

Thinghmui i a sullam cu sualnak a si. Kan sualpalh bu he Jesuh kan ton tikah Jesuh nih a zaa ko cang, va kir cang ko, ti lo in tlangbawi sin kal a kan fial`han rih mi cu, a cunglei Bible cacaang hna i sual ngaithiamnak nawl a rak pekmi hna kha hlennak le cawhdehnak men an si lo, ti langhternak a si.

Cun minung le minung ciocio sual i thlahpiak khawh a si lai lo, timi caah ruat rih usih. Nangmah cu minung na si ve ko nain, mithah lainawn bia kha biaceih zung i bia ceihtu bantukin na ngaithiam kho maw? Jerusalem khua pawng in mizaw le khuachia tuahmi tampi an rak pi hna i, an ihkhun he lamkam ah an ih ter hna i, Peter aa chawh tikah a thlatal nih tawng kho hna seh an ti, an dihlak in an dam dih. Mithi hmanh a thawhter. Minung ciocio kan si ko nain Peter bantukin kan tuah kho dih maw? thlarau lei zongah Khrihfa ciocio cu kan si ko nain cunglei in Ordination a hmu mi le hmu lomi cu kan i khat lo ti cu mikip nih theih dih ciomi a si ko. David nih chiti thuh mi Sawl cungah zeitluk indah upat a pek.

Cucaah minung ciocio ti lungput cu mi tangdor duh lonak lungput menmen a si ko.