SIANGBAWI CANNAK

Micheu nih Pathian nih tefa ngeih ding le pungkarh dingin a kan fial caah nupi ngeih lo le vaa ngeih lo cu Pathian duhnak al a si i, siningleng nun a si an ti.

Asinain hi nupi ngei lo in Pathian rianttuan timi hi a mikip caah a si lo tiah Jesuh nih a ti. Mat; 19:12 ah “Jesuh nih cun hi cawnpiaknak hi a mikip caah a silo, Pathian nih a thimmi hna ca lawngah a si. Mi nih nupi an ngeih khawh lonak sullam a dangdang a um cio: acheu cu an i chuahpi mi a si (ngandam lo ruangah a si lai cu), a cheu cu mi nih cuticun an sermi an si (tildit mi pawl an si lai cu), a cheu cu Vancung pennak ruang hrimhrim i nupi ngei loin a ummi an si (Peter chim lo, nupi  a ngei lomi a dang Lamkaltu hna bantuk kan ti lai cu) hi cawnpiaknak a zul kho mi nih cun, cuticun zul ko hna seh,” a ti.

Cun 1Cor; 7:36-38 ah duhnak i suum khawh lo ahcun nupi tthit cu a ttha ko. Asinain a duhnak aa suum khawh i, nupi tthit lo i a um kho mi nih khan thilttha chinchin a tuah, tiah Paul nih a ti. 1Cor; 7:32-34 ah “Nupi ngei lo pa cu Bawipa duhnak tuah kha aa zuam caah Bawipa rian ahkhan lungrethei in a ttuan. Nupi ngeimi pa cu a nupi duhnak tuah aa zuam caah vawleicung thilri kha a lungre a theihpi hna, cucaah kaphnih in hmuh a si. Va a ngei lomi an si ah, ngaknu thiang an si ah, pum he thlarau he Bawipa sinah khan i pek an duh caah Bawipa rian cu lungthin tak tein an ttuan,” a ti. Cucaah Pathian duhnak hi zei deuh hi dah a si ti cu, a cunglei cacaang hna nih a fianter dih ko cang.

Hi thisa suumnak hi minung tthawnnak lawngin tei khawh a si lo. Pathian vel le Thiang Thlarau bawmhnak thawng lawng in tei khawh a si. Thiang Thlarau rian`uannak aa telnak poah ahcun siningleng nunnak a um zungzal lai. Jesuh nih Jeim le John a auh lio hna ah khan rak ka zul u a ti hna i, kan in zulh ahcun zeidah kan hmuh lai ti zong hal bak loin an pa kha sur he an kaltak duak i an zulh colh. Mathai kha a zungah a tthut ko lioah Jesuh nih “Ka zul” a ti i, zeidah kahmuh lai ti zong hal bak loin, a zulh colh ko. Cu bantuk in Mithiang hna an nunzia zonghi, minung thisa lawng i, ruah ahcun a si kho lo ding lawngte an si ko.

Cucaah nupi ngeih bu he Pathian rianttuan cu thilttha a si ko bantukin nupi ngeilo le va ngeilo i Pathian rian`uan cu Paul nih thil`ha chinchin a si a ti. Thisa i a nung ve mi minung kan caah minung thianghlim nun (01,99) a si deuh taktak ko. Cucu Thiang Thlarau rianttuannak a tel ruangah a si.