ZUMHNAK BIATHUK A SI

Bawipa thisa upatnak le thangthatnak in Bawipa thisa kong tlawmpal in vun ruat hna u sih.

Mithiang Thomas Aquainas nih Bawipa thisa hla kha hi bang in a phuah. “Cungnungbik mi Sacrament kha lukun khukbil in kan biak. Biakam Hlun cu Biakam Thar ah aa thleng i a tling dih cang. Pumsa nih a theihthiam lo mi zumhnak nih a kan hngalhter,” a ti.

Bawipa thisa kong hi zumh a har ko. Minung fimthiamnak pinlei in a rat caah a si. Bawi Jesuh hrimhrim nih a thi le a sa kong a cawnpiak lio hna ah Judah mi pawl nih, “Hi cawnpiaknak cu a har tuk. Ahodah a pawm kho lai? an ti i Bawi Jesuh kha an kaltak(Jn 6:60,66.). Tuchan ah Khrihfa Bu tampi zong Bawi Jesuh a duh ning in changreu kha ka Pum a ti caah changreu cu Bawipa Pum taktak in an pawm kho lo i misurhang zong ka thi a ti tikah a thi taktak in an pawm kho lo. Hmanungbik zanriah an ei lio a rak tuahser mi kha ruahnawlhnak menmen in an pawm. An mawh lo, pumsa sining lawngin an zoh caah le an zumh caah a si.

Missa kan tuah lio ah Bawipa thisa sernak a vun dih le cangka tlangbawi nih “Zumhnak biathuk a si,” tiah a rak au. A si. Bawipa thisa cu zumhnak biathuk a si. Cucaah Mithiang Thomas Aquinas nih cun zumhnak nih a kan hngalhter tiah a ti mi cu a si.

Khrihfa zumhnak bia vialte hi biathuk an si dih. Zeicatiah vawlei pumsa nunnak leng i a um mi thil hna kong kha an chim mi a si. Vawlei  pumsa nunnak he aa pehtlaih deuh mi kong cu a hngalh a fawi deuh, a zumh a fawi deuh. Hrin`hannak kong a vun cawnpiak tikah Nikodemus cu a theihthiam kho lo. Bawi Jesuh nih, “Nangmah cu Israel cawnpiaktu na si i hi kong na theithim kho lo maw?,” a ti kha. (Jn 3:3-10) Bawi Jesuh nih Vancung pennak kong biathuk a cawnpiak tikah bianabia kha a hman hna, cucu pumsa nih a theihthiam lo mi thil hna kha theihthiam deuh awkah a bawmh caah a si.

/- Catial tu - Fr. Paul Thla Kio