Pope nih biaknak karlak pehtlaihnak fek deuh in tuah dingin sawmnak a tuah

Pope Francis nih Sept. 4 ah biaknak karlak pehtlaihnak cu ralhrang le tuar khawh lonak doh awkah "fehter" a hau tiah a ti. Asia-Pacific khualtlawnnak cu Muslim tamnak Indonesia ram in a thawk.

President Joko Widodo he an i ton hnu ah bia a chimmi ah biaknak karlak biaruahnak cu "a tlangpi in harnak ton khawhnak ding caah a herh tukmi a si, cu ah cun a hlei in tuahmi thil le intuar khawh lonak dohnak zong aa tel," tiah a chim.

Vawleicung Catholic 1.3 billion lubik a si mi Pope cu Indonesia ram ah nithum chung a caam. Papua New Guinea, East Timor le Singapore timi ram hna ni 12 chung a tlawn lai hna nak ah a voikhatnak bik a tlawnnak ram a si.

"Daihnak a chuahtertu ser khawhnak ding caah Catholic Khrihfabu nih biaknak karlak biaruahnak karhter a duh," tiah Jakarta um president innpi ah nawlngeitu hna sinah a chim.

Indonesia ram nih hin Islamist ralhrang pawl he caan saupi dohnak a rak um cang. 2002 ah Bali tikulh ah bomb puahnak in minung 202 zong an rak thi.

Ralhrang pawl nih khrihfa biakinn pawl zong an kah hna

Kum 2021, Palm Sunday ah, Islamic State he pehtlaihnak a ngeimi phu nih South Sulawesi i Makassar Biakinn cu bomb an rak thlak. 2018 ah East Java, Surabaya khua i biakinn pathum bomb an rak puah i, hi bantukin biaknak he aa pehtlai mi hmun ah thil a cangmi hi a voikhatnak zong a si.

Indonesia tuanbia zongah hi biakinn kahdohnak i a thimi an tam biknak hmun zong a si i ralhrang dohnak tiang a chuahpi.

Pope nih a tlawn lainak ding hmun hna zong himnak a umnak ding caah ṭha tein check nak zong an tuah. Cun pawngkam lam pawl zong um kalning an thlen hna i a cheu cu a khar zong an khar chung.

Biachimnak le cawnpiaknak hna nikhat hnu nikhat khuapi biakinnpi hna ah tuah an si i Sept. 5 ah minung 80,000 tlummi ram pumpi bawlung chuihnak hmun ah Missa tuah-pumhnak zong aa tel.

'Aa lo cio lomi sining in lungrualnak'

Pope nih Indonesia cu “nunphung le biaknak aa dangmi hna i tonnak le biaruahnak ram” tiah a cohlan i a mipi hna cu “zumhnak, unau dawtnak le zawnruahnak ah ṭhangcho” hna seh ti a duh hna.

Rili nih a tikulh 7,000 leng a fonh hna bantukin miphun le biaknak aa dangmi Indonesia mi hna cu zeitindah “i funtomnak hmun” ah an can ti zong kha Pope nih a langhter.

An ram pumpi biatleih (moto), ‘United in Diversity’ timi nih mi vialte kha i dan zongah unau bantukin i cohlan a herh tiah a ti. “Nunphung tampi le ruahnak aa dangmi hmuhnak le lungrualnak a fehtermi ruahnak hna karlak ah hi fimnak ngai in tlukruannak(imbalance) a um lonak hnga ding caah pehzulh in kilven a hau,” tiah a ti.

Catholic Khrihfabu nih biaknak karlak biaruahnak thanchoternak caah “daihnak le theipar a tlaimi lungrualnak” sersiamnak ah aa tel lai tiah bia a kamh hna.

Khrihfabu nih “mi zapi ṭhatnak caah rian a ṭuan i mipi chung i a dang rianṭuantu hna he rianṭuanṭinak fehter a duh, Aa tluk mi zatlang nun sernak thazaang a pek i zatlang bawmhnak kha ttha deuh le tlukruang deuh in phawtzamhnak a tuah.”

Biaknak karlak biaruahnak nih thleidannak a hloh khawh i pakhat le pakhat i upatnak le zumhnak a chuahter khawh tiah a ti.

“Mipi kar ah lungrualnak, zatlang dinfelnak le Pathian thluachuahnak hna cu Indonesia Phunghrampi hrampi phunglam an si” i ramchung ah “zatlang nunning thazaang peknak le lamhruainak” caah timhmi an si. “Annih cu bawmchantu thilri, inn saknak ding caah a fekmi tung hrampi he tahchunh khawh an si,” tiah Pope nih a ti.

Rammi nawlngeitu hna nih tlukruannak an tuah tikah buainak a chuak kho tiah a ti. Lungrualnak cu “kanmah duhnak le hmuhnak lawng si loin mi vialte ṭhatnak caah kan i pekchanh tikah, ziaza, sipuazi le zatlang harnak phunkip tei khawh dingah thazaang kan i fonh tikah le daihnak le lungrualnak kan ṭhanchoter tikah” a chuak.”  UCA News in kan lakmi asi.