Pope Francis nih Asia Pacific ram a tlawn

Pope Francis cu Asia Pacific ram ramli tlawn awk ah nihin September 2 ah Vatican in aa thawh cang lai i ni 12 chung a rau lai. Hi a khual tlawnnak cu 2013 ah Pope i thim a rak sinak in a tutiang ah  a saubik le a rau bikmi Pope khualtlawnnak tuanbia ah a cang lai. Kum 87 a si cangmi Pope Francis nih Indonesia, Papua New Guinea, Timor-Leste le Singapore a tlawn hna lai i hi a khual tlawnnak cu vanlawng in suimilam 43 a rau lai i a hmun`huntnak Vatican in 32,000 km a hlat lai.

Pope cu bronchitis le ruh zawtnak a tuar i kan hnu kum lio hna ah khual tlawnnak le meeting tuah ding vialte hna zong thawn a rak si. Tutan a khual tlawnnak hi a luanciami 2020 ah tlawn dingin a rak i timhmi a sinain Covid-19 ruangah an rak thawnmi asi. Hi a khual tlawnnak ah a biapi bik in tuah aa tinhmi cu Biaknak pakhat le pakhat karlak i remdaihnak a si i ramchung um Catholic Khrihfa hna lawng si loin Biaknak dang lutlai hna le acozah upa hna he zong tonnak a ngei lai.

Cacawn nihnih ni zanlei ah Jakarta ah a phan cawnni thum ni ah Indonesia President Joko Widodo he Merceka Palace ah an i tong lai. Cacawn nili ni ah Jakarta i a ummi Istiqlal Muslim Biakinn ah Biaknak dangdang hna i tonnak ah aa tel ve lai tiah an ruah. Cu hnu ah Gelora Bung Karno Stadium ah Missa raithawinak a ngei lai i cu ka ahcun Catholic 80,000 an si lai. Indonesia hi Muslim ram a si i an ram milu dihlak ah 280 million an si, Catholic hi ram milu dihlak zatuak i 3.1% an si. Pope Francis nih zeitluk in dah i dannak, i lawh lonak hna cung ah rualrem tein um khawhnak le Vatican le Asia karlak ah naihniamnak zeitluk in dah a umter khawh lai tiah vawlei pi nih a cuanh tiah thil sining a cuantu hna nih an chim.