Bawipa Jesu Tipil Innak

Jesuh Tipil Innak

Zapi hmai ah Jesu aa phuannak, a langhnak, a umnak cu Jordan tiva ah Johan nih tipil a peknak in aa thawk. (Lk 3:23). Johan nih “Sual ngaihthiamnak caah lungthlen tipil innak” kong kha a chim (Lk 3:3). Misual Atampi, ngunkhuai khawltu hna le ralkap hna, Farasi hna, Sadusi hna le hlawhhlang nu hna cu Johan sinah tipil in awk ah an ra (Lk 3:10-14, Mt 3:7, 21:32).

 Cun Jesu a hung lang. Tipil petu cu aa laklawh; sihmanhsehlaw Jesu nih a hnek i tipilnak kha a pek ve. Cun Thiangthlarau cu tthuro mui in a rung lang i van in aw pakhat nih a chim “Mah hi ka dawtmi ka Fapa a si” tiah a ti(Mt 3:13-17). Mah hi Jesuh cu Israel mi nih an hngahmi Mesiah le Pathian Fapa in a langhnak (Epiphanny) cu a si. Jesuh tipil a innak cu temhnak a ingmi “Pathian Sal” ti in rianttuan hram aa thawhnak a si.

 A mah nih a mah kha misual hna he rel chih a duh. A mah cu Pathian tufa hi vawlei sualnak a kal pitu a si (Jn 1:29, Is 53:12).A thi in tipilnak a hmuh chungnak a si(Mk 10:38, Lk 12:50). A mah nih Pathian duhnak kha a tuah cang i cuticun dinnak vialte kha tlinh hram aa thawk. Kan sualnak vialte kha hnawh piak awk ah thihnak tipil kha in awk ah a hna a tla(Mt 3:15, 26-39). Pa aw nih a fapa cungah a lungtlin dihnak kha a langhter(lk 3:22, Is 42:1).

 Bawinu Mary nih Bawi Jesuh kha a pawi cangka in Jesuh nih a rak ngeihmi Thlarau cu a cung ah aa din (Jn 1:32-33, Is 11:2). Jesuh cu mi vialte caah thlarau hrampi a si lai. Tipil a innak ah vancung cu aa hung (Mt 3:16). Vancung cu Adam sualnak nih a khar cangmi a si. Ti hna cu Jesuh le thlarau ttumnak nih a thianter cang. Cucu serthar nak kha a chim duh mi cu a si.

Tipilnak thawngin Khrihfa cu Sacrament phung ah Jesuh Khrih he i lawh a si. Jesuh cu tipil a innak in a thihnak le a thawhtthannak kha a hmuh chung cang. Khrihfa zong mah le mah i niamter nak le lungthlennak ah luh ve a si i Jesuh he thawhtthan awk ah ti chung ah a pilmi kan si. Fapa chungah dawtbik fa si awk caah ti le thlarau in hrin le nunnak thar ah nun a hau (Rom 6:4).