Biakam Thar Biakttheng

Biakam Thar i “Thlarau le biatak in” (Jn 4:24) biaknak cu hmun pakhat khat caah a si lo. Vawlei pumpaluk hi a thiangmi a si i minung fa le hna sinah pek a si. A biapi mi cu zumtu hna hmun khat ah an i pumh tikah annih cu “ a nungmi lung hna, thlarau inn ah sakmi” in an i pumhmi kha a si.(1Peter 2:4-5). Zeicahtiah a thotthanmi Khrih Pum cu Thlarau biakinn a si i mahka cun a nungmi tiva hrampi cu a hung chuak. Thiang Thlarau in KHrih chungah pumkhat siter kan si i kan nih cu a nungmi Pathian biakinn kan si. (2Cor 6:16).
Biaknak zalonnak a um ahcun Khrihfa hna nih Pathian biaknakcah inn kha an sak. Mah hmuh khawhmi biakinn hna cu pumhnak hmun menmen an si lo. Cu hmun i a ummi Bupi kha a sawh i hmuhkhawh a siter. Khrih ah minung he aa remmi le aa nuam mi Pathian kha a sawh I a langhter.
Biakinn pakhat ah Bawipa Thisa tuahnak le chiahnak a si mi thlacamnak inn, zumtu hna an i pumhnak le Pathian Fapa kan khamhtu a umnak kha biaknak hmun, zumtu hna bawmhnak le hnemhnak an hmuhnak caah raithawinak pekchanhnak hmun a si. Cucaah mah biakinn cu zoh aa dawhmi le thlacamnak le biaknak thiang hna tuah awk caah aa tlakmi hmun a si awk a si. Cu Pathian inn chungah biatak le a dirpimi hmelchunhnak aa ruannak nih Khrih cu hi hmun ah a um i thil a tuah ti kha a langhter awk a si.
Biakam Thar biakttheng cu Bawipa vailamtah a si (Heb 13:10). Cuka hmun ahcun Lanhtak Biathuk sacrament hna cu an hung luang. Biakinn laifang a simi biakttheng cungah, vailam cung raithawinak cu sacrament hmelchunhnak hna tangah umter a si. Biakttheng cu Bawipa cabuai zong a si. Cu biakttheng lei ah Pathian miphun hna cu sawm an si. Biakttheng cu thlan hmelchunhnak zong a si(Khrih cu a thi taktak i a tho tthan taktak).
Kuang thiang (Bawipa Thisa chiahnak kuang) cu biakinn chungah upatnak nganbik pek aa tlaknak hmun ah chiah awk a si. Bawipa Thisa kuang upat sinak, chiahnak ningcang le himnak nih biakttheng cung um sacrament Thiang chung i a ummi Bawipa hmai ah biak duhnak lungthin a chuahter awk a si.
Chiti thiang, Thiang Thlarau peknak sacrament ah hmanmi cu hmun thiang chungah upatnak he a himnak hmun ah chiah awk a si. Khrihfa a lutmi hna thuhmi chiti le mizaw thuhmi chihti hna zong cuka ah chiah awk an si. Bishop asiloah siangbawi tthutdan (Cathedral) nih a pimmi hna uknak le thlacam hruainak nawl (office) a ngeihnak kha a langhter awk a si.
Bible relnak hmun (Lectern or ambo) Pathian Bia upat a sinak nih biakinn ah phungchimnak hmun pakhat kha a tlak tein a herh. Khi tikah minung lunghtin cu fawi tein phungchim chungah mah hmun lei ah aa mer kholai.
Pathian miphun hna an i pumhnak u tipilnak in aa thawk. Cu cah biakinn pakhat ah tipil peknak hmun pakhat a um a hau i, tipil in lio biakamnak philhlonak caah tithiang hmun a hau.
Tipilnunnak tharchuah awk caah sual ngaihchihnak a herh. Cucaah sual ngaichihnak langhternak le sualngaihthiamnak hmuhnak hnga caah sualphuannak hmun pakhat a hau.
Hmanung bik ah, Biakinn cu caan donghnak sullam a ngeih awk a si. Pathian inn i vun luh awk ah kutka ri pakhat kan tan a hau. Sualnak vawlei in nunnak thar vawlei ah kan lan tinak a si. Biakinn cu Pathian miphun hna Pa inn lei khualtlawnnak hmelchunhnak pakhat a si i Pa nih “an mitthli vialte a hnawh piaknak hmun a si (Rev 21:4).” Mah ruang zongah hin biakinn cu Pathian fale vialte an inn, hun zungzalmi le mi vialte a dongmi a si awk a si.