Biaknak le Nunphung

Biaknak le Nunphung

Biaknak le Phungbia le Catholic Bupi cu zapi caah a sinak

Hmasabik Jerusalem Khrihfabu thawkin caan a dongh hlantiang Bupi nih, Lamkaltu hna zumhnak cungah zumhtlak tein khuazakip hmunkip i a tuahmi cu Lanhtak Biathuk pakhat hi a si ko. Biaknak ah tuahmi biathuk cu pakhat asi, sihmanhsehlaw tuahnak pungsan cu aa dang.

Khrih biathuk hna cu dih donghnak ngei lo in a rum tuk caah biaknak phungbia pakhat ah phuan dih khawh a si lo. Mah le biaknak tuahser ningcang a hung chuak cio i an `thanchonak tuanbia nih pakhat le pakhat an i tlinternak kha tehte an khaan. Bupi hna nih anmah le an biaknak phungbia kha zumhnak ah pumkhat sinak le sacrament hna kha an vun nun tikah, pakhat le pakhat an i rumter deuh i phungbia ah le Bupi mission aa khatmi cungah zumhtlak sinak ah an `hang.

Aa dangmi biaknak phungbia hna cu Bupi mission hrimhrim in a rak chuakmi a si. Pengkhat ramkhat le nunphung pakhat i a ummi Bupi cu Khrih biathuk hna kha nunphung nih a lak ning khan an tuah; “Zumhnak Ro” (2Tim 1:14) an hmuhnak phungbia in biaknak hmelchunhnak in, unau pumkhat sinak an ngeih ning in biathuk kong an theihthiam ningin, thiamnak pungsan a phunphun in mah le peng cio in hmanmi biaknak nunnak in, mi vialte caah ceunak le khamhnak a si mi Khrih cu mah miphun le nunphung ah phuan a si i , Bupi cu mi vialte caah a si i mi vialte kha a thianter dih hna. Nunphung rumnak taktak vialte kha pumkhat a sinak chungah a hman khawh dih hna.

A tu Bupi chung i kan hmanmi biaknak phungbia cu Latin (Rome) ta a si.  Peng dang i an hmanmi biaknak phungbia hna cu Ambrosian, Byzantine, Alexandrian asiloah Coptic, Syriac, Armenian, Maronite le Chaldean hna hi an si. Mah vialte hi Catholic Bupi nih hmannak nawl a pekmi an si i fimken ding le zohkhenh dingah a duh hna.

Cucaah biaknak tuahnak cu miphun dangdang hna i an fimthiamnak le an nunphung ning tein a si awk a si. Khrih biathuk kha miphun vialte nih an hngalhnak hnga le zumhnak nawlngeihnak (Rom 16:26) a chuahpinak hnga caah, nunphung vialte nih an hngalhnak hnga caah nunphung vialte ah chim, tuah le nun a hau. Nunphung hna cu Khrih biathuk nih a hrawh awk a si lo. A khamh i a tlinter awk tu a si. Khrih nih a lak i a muihmel a thlenmi mah le nunphung he le nunphung thawngin  Pathian fa relcawklo hna nih Thlarau pakhat chungin Pa sinah an phan kho lai.

Biaknak ah abikin Sacrament hna kongah thlen khawhmi le thlen khawhlo mi ti in a um. Thlen khawhlo mi cu Khrih nih a sermi zawn kha a si i mah caah Bupi cu chawkengtu lawng a si. Thlen khawhmi pawl cu Bupi nawlngeihnak tangah a ummi a si i a thar in thawng`ha a pommi miphun hna nunphung ningin hman khawhmi kha a si.

Biaknak aa lawh lonak hi rumnak hram a si kho, sihmanhsehlaw lungtlin lonak, i theihsualnak le bu `hennak tiang hmanh a chuahter kho. Mah kongah a fiangmi cu i lawhlonak nih lungkhahnak kha a hrawh awk a si lo. Zumhnak pakhat cungah, Khrih sin in Bupi nih a hmuhmi sacrament hmelchunhnak hna cungah le Bupi uknak pakhat a sinak cung tu ah zumhtlak a sinak kha a langhter awk a si. Nunphung i laknak nih hin lungthin thlennak a herh i, a herh ahcun Catholic zumhnak he aa komh kho lo mi pupa phunglam hna cu kaltak hmanh a hau ko lai.   

Add new comment

5 + 5 =