Ka Zumh

Zumhnak phuannak

Pathian cungah kan zumhnak kha “Ka zumh”, a siloah “Kan zumh” ti in kan phuan. Bupi zumhnak kong kan cawn hlan ah  “Zumhnak” a ningcang kha kan zoh hmasa lai.

Minung nih Pathian a theih: Pathian duhnak lungthin: Pathian duhnak cu minung lungthin chungah ttial a si. Zeicah tiah minung cu Pathian nih amah caah a ser i Pathian nih minung kha amah sinah a hnuh zungzal. Biatak le nuamhnak kha ngol loin a kawl lengmang mi hna nih Pathian sin lawngah an hmuh lai.

Hlan lio pi in nihin ni tiang minung nih Pathian an kawlnak kha biaknak lei an zumhnak, an biak ningcang, an ziaza, an thlacamnak, an raithawinak le a dang a phunphun in an langhter. Zeicahtiah hringsortu pakhat in Pathian nih miphun vialte kha vawlei dihlak ah um dih awkin a ser hna, an caan le an umnak hmun caah  ramri a chiah piak dih hna. Cucu an nih nih Pathian kha an kawl i Pathian kha an theihthiam i an hmuhnak hnga caah a si. Angaite tiahcun Pathian cu a ho kan sin cio hmanh in aa hlat lo. Zeichatiah amah chungah kan nung, kan cawlcang i kan um.(Lam 17:26-28).

Sihmanhsehlaw, minung nih  Pathian he kan i peh tlaihnak hri hi kan chah khawh, kan zohkhenh khawh i langhngan pi zong in  hlawt khawh a si tawn. Mah bantuk lungthin ngeihnak hi konglam tampi a ngei kho. Vawilei cungah a ummi tthatlo nak kha dohnak, Biaknak kong hngalhlo nak le zeirel lo nak, vawlei cung lung retheihnak, rumnak, zumtu hna i lamttha lo hmuhsaknak, biaknak he a ralchan mi tuchan ruahnak le a hmanung bikah sual tuk ruangah  Pathian kha ttih in i thuhnak le a mah auhnak in zam duhnak ti mi misual lungput hna hi an si.

“Bawipa a kawlmi hna an lungthin cu i lawm ko seh.” (Ps 105:3) Minung nih Pathian kha philh a siloah hlaw hmanh u silaw Pathian nih minung kha amah kawl awkah ngolo in a auh zungzal ko. Nunnak le nuamhnak kha hmu hna seh ti a duh zungzal. Sihmanhsseh law Pathian kawlnak caah fimnak dihlak le lungthin dihlak kha hman a hau i Pathian kawlnak ah cawnpiaktu zong an herh.

Pathian muisam in sermi a si i a mah kha hngalh awk le dawt awkah auh a si mi minung nih Pathian hngalhnak lam kha an hmuh. Cu hna cu Pathian a umnak kong tehte piahnak an si. Pathian kawhnak lam cu phunhnih a um:  Pakhat nak ah, Sermi vawlei, le pahnihnak ah  Minung hi an si

Vawlei a cawlcanghnak, a rak semnak, a sicannak, ningcang tein a umnak le aa dawhnak hna nih hin Pathian cu zeizong vialte an thoknak le donghnak a si ti kha a kan hngalh ter khawh.

Mithiang Paul nih Gentel mi kong a chim mi bang khan a si ko. “Zeicahtiah Pathian kong hngalhkhawhnak cu an caah a fiang ko. Pathian nih a hmuhsak cang hna . Vawlei hramthawk inhmuhkhawhlo mi a sining, a min ka chim ahcun a hmun zungzal mi a thawnnak le a Pathian sinak cu sermi thilvialte cungah hmuhkhawh a rak si cang.(Rom 1:19-20), Lam 14 :15,17, 27:27-28. Fimnak 13:1-9

Mithiang Augustine nih hi bangin bia halnak a rak tuah bal. “Vawlei aa dawhnak kong hal tuah, rili aa dawhnak kong kha hal tuah, thli a mah tein a tamnak le aa theknak le aa dawhnak kha hal tuah, van aa dawhnak kong kha hal tuah.... Mah thil vialte kha hal dih hna, an zapi tein an vun leh mi cu: “Zoh hmanh, kan nih cu kan i dawh,” an ti. An i dawhnak cu phuannak pakhat a si. Hi dawhnak vialte cu an i thleng kho dih. Aa thleng kho lo mi aa Dawh Mi nih a ser hna lo ah cun a ho nih dah a ser hna hnga?

Biatak le dawhnak a duhning, ziaza thatnak a hngalh ning, a zalonnak le chiattha thleidannak lungthin, dong hngallo mi nuamhnak a duh ning, hi vialte nih hin Pathian a umnak kong a mah lila bia aa hal ter. Hi vialte chungin thlarau a ngeih nak hmelchunnak kha a lang. Kan thlarau hi zungzal a hmunmi thlarau a si caah zungzal a hmunmi thil lawnglawng kha a duh hna i vawlei thilri sawh sawh in a di a raim kho lo. Cucaah thlarau hiPaathian sin lanaglawng ah hramthawknak a ngei.

Vawlei le minung nih a mah tein an hramthawhnak le an donghnak an ngei lo i hramthawknak le donghnak a ngei lomi Pathain thawng in kan si, ti kha an hmuh sak. Cuticun mnung nih thil vialte a thawknak le a donghnak a si mi thil kha a rak um ti kha an rak hngalh khawh. Sihmanhsehlaw Pathian he i naihte in i komh awkah Pathaina nih a mah hrimhraim kha minung sinah i phuan a duh i mah aa phuan mi kha minung nih zumhnak in cohlang thiam hna seh tiah vel kha a pek hna. Pathian a umnak kong tehte hna ah mi pakhat kha zumhnak caah a timh piak kho i zumhnak hi ruahnak he a ralcahn ko ti kha theihh thiam awkah a bawmh.

Minung nih ruahnak lungthin in sermi thil hna chungah khan Pathian a umnak kong kha fiang tein a theihn khawh. Cu bang hngalh khawhnak lo cun Pathain biaphaun kha an colhang kho lai lo.Minung nih mah hngalhkhawhnak a ngeimi cu “Pahain muisam “ in sermi a si caah a si. (Gen.1:27)