Minung Huham he Pehtlaimi Khrihfa Cawnpiaknak

(3) Khrihfa cawnpiaknak

Khrihfa hmuhnak in minung thawhkehnak cawnnak (Christian Anthropology) he a pehtlaimi cawnpiaknak ah asi taktak mi minung nunzia a hram karhchonak, tinhmi, ahnubik kawltung hna kha fiang tein a cawnpiak.

Bible chung cawnpiak ningin minung cu Pathian muisam in sermi kan si. Cucaah a thi kholo mi thlarau kan ngei cio. Minung nunnak cu a thuk hringhran i kokek phung nakin a sangdeuh mi nunzia kan ngei. Culengah minung nih a hnubik kan kawltung cu hi vawlei cungah donghter ding kha silo i zungzal caah asi.

Khrihfa zatlang nunphung cawnpiaknak timi zong nih “Pathian le minung karlak pehtlaihnak kha a cawnpiak. Bupi cawnpiaknak hna cu Pathian i ceunak pekmi langhternak (Divine Revelation) kha hrambunh in a cawnpiak. Cubantuk cawnnak cu Theology” tiah an ti. Phundang in “Zumhnak ningcang fimnak” (Science of faith) an ti. Zumhnak he aa pehtlai mi fimnak pakhat asi.

Cu fimnak ahcun minung timi cu Pathian muisam in sermi asi caah minung nunnak timi cu; 
- Pathian sinah a hmaihoih- Sermi le khamhmi asi.
- Dinfelnak leiah a hmaithlak- Dawtnak kha a duh.
-`Thatnak ah a hmaihoih- A tling cikcek mi leiah a hoih.

Pope John Paul II nih “Bupi i zatlang nunphung cawnpiaknak cu minung i a hmanbik mi hmuhnak le minung i asangbik mi man ngeihnak kha a langhtertu asi” ¹⁰  tiah a chim. “Khuaruahnak thiamsang hna nih kokek a lonhmi nunnak le minung nunnak hmaihoih hna kha an hlathlai kho lo”. Ram rian `tuannak, zatlang nunphung, `thanchonak, minung tuanbia pakhat lawngte nih asi taktak mi minung nunzia le dinfelnak, minung kokek hna kha thlamtling tein a sullam a fianter kho lailo. Kokek phung nakin a lonhmi minung nunnak hmaan le kawltung kha kaltak in nunnak kha tha tein hlathlai khawh asilo.¹¹  tiah a cawnpiak.

Cu asicaah minung nunnak sican ning, asi taktak mi nunzia tinhmi, ruahchan mi kawltung hna kha Bible ca, Bupi i pacan  deuh hna i cawnpiaknak le Bupi i zatlang nunphung cawnpiaknak hna lawngah kan hmuh khawh. Cu asi taktak mi thilhmaan hna kha “Pathian i ceunak pekmi langhternak” (Divine Revelation) an ti.
“Pathian i ceunak pekmi langhternak hna ah Bawipa Jesuh cu Vanrang tawi le minung tuanbia i a muru” ¹² tiah a biapi in a cawnpia caah Khrihfa hna i minung thawhkehnak cawnnak timi cu Jesuh Khrih kha laifang chiah i cawnpiak mi zumhnak he a pehtlaimi fimnak pakhat asi. Jesuh Khrih cu dinfelnak le minung caah a tling cikcek mi zohchunh awk asi tiah a ti. Cucu “Bawipa Jesuh ah a laifang chiah i minung nunnak hlathlai mi minung thawhkehnak cawnmi fimnak” (Christo Centric Anthropology) ti zongin an ti.

10. Pope John Paul II, Encyclical Letter Centesimus Annus, 1 May 1991, AAS 83 (1991) no. 11.

11. Edward T. Mechmann, God, Society and The Human Person: The Basic of Catholic Social Teaching, AlbaaHouse, New York 2000, p.1

12. Pope John Paul II, Encyclical Letter Redemgtor HOminis, 4 March 1979: AAS 71 (1979), no, 1