Pathian Biaphuan Chanhchinnak

 PHUNGBIA LE CATHIANG I PEHTLAIHNAK

Pathian nih Minung vialte hi khamh si hna sehlaw biatak kha hngal dih hna seh ti a duh (1Tim 2:4). Cu biatak cu Khrih Jesu kong kha a si (Jn 14:6). Khrih kong cu vawlei cung miphun vialte le mi bialte sin ah chim dih awk a si i cuticun Pathian biaphuan cu van hramdeng tiang a phan lai (2Cor 1:20, 3:16, 4:6). Khrih kan Bawipa chungah Pathian bia phuan vialte a tling dih. Khrih nih Lamkaltu hna kha Thawngttha phuan awk ah a fial hna. Thawngttha phuan nak in an nih nih Pathain laksawng hna kha mi vialte cung ah an pek hna. Mah Thawngttha hi khamhnak biatak le ziaza cawnpiaknak hram pi ah a hung cang.(Mt 28:19-20).

Lamkaltu hna kha phung chim awkah Bawipa nih a fial hna. Nawl a pek hna bantuk in Thawngttha bia cu kaa in cawnpiaknak le ca in ttialnak ti in phun hnih in an rak i chan chin. Lamkaltu hna nih Khrih hmuka in siseh, a nunnak le a rianttuannak in siseh, a siloah, ThiangThlarau hruainak in siseh, an hmuh an cohlan mi kha, an phung chimnak, an ziaza le an tuahsernak hna khan chan khat hnu chan khat an i chan chin. Lamkaltu hna he aa kommi mi dang hna nih Thlarau Thaw khumhnak in  khamhnak Thawngttha kha ca in an ttial.

A tling i a nungmi Thawngttha kha Bupi chungah himte in fimhlawm awk caah lamkaltu hna nih bishop hna kha an mah rian chaangtu ah an chiah tak hna. Cawnpiaknak nawl an hmuh mi kha an pektak hna. Lamkaltu hna he petlai thliahmah nak ngeih in cawnpiakmi vialte kha can a songh tiang himtein zohkhneh awk le kilven awk a rak a si.

Thianag Thlarau hruainak thawng in ca le bia ah tling tein i chanhchinmi hi {hungbia (Tradition) tiah auh a si Phung bia cu Ca Thiang he a dang nain Ca Thiang he an i pehtlai. Phungbia in Bupi cawnpiaknak, nunnak, biaknak le sining vialte cu a zummi techin fapar chankip cungah chanhchin lengmang a si. A thiangmi Khrihfa pupa hna chimrelmi bia cu cawnpiaknak a nunnak petu ah a cang. Khrihfa Bupi tuahsernak le nunnak, zumhnak le thlacamnak kha a kauhter i a rum ter. Thlarau ah phuanmi bealte kha Bupi chungah a um zungzal i a nung zungzal ko. Hlanlio ah bia a rak chimtu Pathian nih a dawt a Fapa i alengnu (bride) a Bupi kha bia a chimh zungzal. Bupi chungah a nungmi Thawngtthabia aw kha a rin tertu Thiang Thlarau nih Bupi thawng in vawlei cungah a zummi vialte hna kha biatak tlinnak ah a hruai hna i an chungah Khrih bia a rummi ah a ser hna.

A thiangmi Phungbia le Cathiang hi i naih tein pehtlaihnak an ngei. zeicahtiah an pahnih in tiput pakhat in an chuak i thil pakhat kha canter awkah hmun khat te in an rak i tlaihnmi kawltung pakha lei ah an hoih. Anmah an sining in “vawlei a dongh tiang a zungzal” umpi awk bia a kammi Khrih biathuk kha Bupi chungah an um ter, thei an tlai ter.(Mt 28:2).

Bible Cathiang cu Pathiang nih a chimmi kha Thiang Thlarau thawkhumhnak in ttialmi a si.

Phungbia nih Bawi Jesu Khri le Thiang Thlarau nih Lamkaltu hna sinah a pektak mi Pathian bia hna a dihlak in a chanhchin. Phungbia nih Pathian bia kha Lamkaltu hna changtu hna sinah a chanhchin i cucu Biatak Thlarau i ceunak peknak thanwg in him tein zohkhenh lilven le a sullalm purhdah in vawlei cung dihlak cawnpiak chin awkah a humhak, a kelven.

Cu asi caah Pathian bia phuan kha phuanchin awk le a sullam phuan awkah ttuanvo pek a si mi Bupi nih a phuanmi Biatak vialte kha Bible Thiang lawnglawng in a la lo. Bible le Phungbia an pahnih in pom le cohlan in upat awk a si.