Ro Sunglawi

ZUMHNAK RO A SULLAM PHUANNAK

Lamkaltu hna nih zumhnak Ro thiang kha Bible Thiang le Phungbia chung i a umning tein Bupi cung ah an pektak dih.(ITim 6:20, IITim 1:12-14). Hi zumhnak Ro thiang ah a taangmi miphun thiang dihlak hna cu an tukhaal hna he hmunkhat tein an um i, cawnpiaknak, unau sinak, changreu cheunak le thlacam nak hna kha an i tlaih zungzal. Cucaah chanhchin mi zumhnak ah i hmunhnak, zumhnak le zulhnak cu bishop hna le zumtu hna rualrem ngai in a um ter kho tu a si.(Lam 2:42).

Pathian bia kha Bible ca chungah ttial mi a si zongah, Pupa cawnpiaknak chungah a ummi a si zongah hmaan tein a sullam phuannak rian cu a nungmi cawnpiaktu Bupi cung lawnglawng ah pek a si. Mah “Nawl Ngeihnak” cu Jesuh Khrih min lawnglawng in hman a si (2Pet1:20). A sullam cu, Bible a sullam phuannak cu Rome Khua Bishop(Pope), Peter changtu hna he komh in  a ummi bishops hna sinah pek a si, ti kha a si.

Sihmahsehlaw mah cawnpiaknak nawl hi Pathian bia nak in a saang deuh ti nak a si lo. Pathian bia i a sal, a rainttuantu lawnglawng a si. Cawnpiaknak nawl a hmu mi hna nih an cawnpiakmi cu “Cawnpiak uh” ti mi bia cawnpiak lawng kha a si. Bawi Jesuh fial nak le Thiang Thlarau hruainak in nawl ngeihnak nih upatnak he a bia a ngaih. Pumpek in a zohkhenh i felfai tein a sullam phuan kha a zuam. Zumh awk bia a timi vialte hi, mah zumhnak bia chung cun a laakmi a si. Khrih nih “Nan bia a ngaimi nih ka bia kha an ngai” tiah Lamkaltu hna sin ah a chim mi bia kha i cinken in Khrifa mi hna nih an tukhaal hna cawnpiak nak le an lamhruainak kha toidor nak in an pom ve. (Lam 10:16).

Cawnpiaknak nawl a ngei mi Bupi nih Khrih sin in a hmuh mi nawlngeihnak kha zumhnak bia fianternak le khiahnak ah tling tein a hman. Bupi nih a cawnpiak mi kha Khrihfa mi nih cohlan awk ah ttuanvo an ngei dih.

Thlarau nunnak le cawnpiaknak karlak ah pehtlaih nak a um. Cawnpiakmi biatak hna cu zumhnak lam caah ceunak a si, zumhnak kha a ceu ter i a him ter. Kan nunzia a din ahcun kan ruahnak le kan lungthin zumhnak cawpiaknak nih a kah mi Ceunak kha a cohlan duh lai.(Jn 8:31-32). Zumtu vialte hi phuan mi biatak theihthiamnak le chanhchinnak kha an i hrawm dih. An nih nih Thiang Thlarau toihnak kha an hmuh ve. Thiang Thlarau nih a cawpiak hna (1Jn 2:20,27) i bia tak chungah khan a hruai hna (Cf Jn 16:13).

“Zumtu Khrihfa pumpi nih zumhnak bia kongah a palh kho lo. Bishop hna thawk in Khrihfa hna tiang zumhnak le ziaza kong ah lungkhat tein an hnatlakmi cu palhthiam a si lo.” (St.Augustine).

Mah bantuk in mi vialte nih an pom khawh i cu biatak thlarau nih an lung a pem ter hna caah le a fehter hna caah a si. Cu caah Pathian miphun hna nih cawnpiaknak nawl in hruaimi zumhnak kha an vun hmuh tikah fek tein an i tlaih, a hmanmi biakhiahnak in a thuk chinchin in an purh i nifatin nunnak ah tling deuh in an hman.(Jud 3).Thiang Thlarau bawmhnak cungah lawmhnak a tampi a um. Zeicahtiah Thiang Thlarau thawngin zumhnak Robia hna theihthiamnak cu Bupi nunnak chungah a tthang ko.

          Hi thil vialte kha an lungthin chungah a rak ruatmi zumtu hna an hmuhton mi tharau lei thil theihfiannak in Bible Thiang cu a relmi hna he a tthang tti.(St.Gregory the great). Bishop rian channak nawl a ngei i biatak laksawng a ngeimi hna phunghimnak in zamhnak theihthiamnak cu a tthang.

          Cucaah a thiangmi Phungbia, Bible Thiang le Bupi cawnpiaknak nawlngeihnak hi an i pehtlai dih, an i komh dih caah pakhat lo in pakhat an dir kho lo. Mah hi Pathian a fimnak in a rak khaan cia mi a si. Mah le sining cio in Thiang Thlarau hruainak tang ah rain an ttuan tti i, thlarau khamhnak caah hmual ngei ngai in an i bawm.