Sacrament Pasarih hna cu

Sacrament

Khrih nih nawlbia thar ah sacrament pasarih kha a ser hna. Mah hna cu;

Tipilnak, Thiang Thlarau peknak, Bawipa Thisa, Sualthlahnak, Mizaw Chiti thuhnak, Tlangbawi cannak le Nupi `thitnak hna an si.

Sacrament pasarih hna nih Khrihfa nunnak kha a dotdot in a biapinak caan vialte kha a tongh dih. Mah sacrament hna nih Khrihfa zumhnak a nunnak kha a hrin i a `hanter, a damter i mission rian kha a pek. Minung pumsa nunnak le thlarau nunnak a sining i aa lawhnak a um.

A cung i thil umtu ning kan hmuh bantuk khan sacrament hmannak kong kha `henthum ah `hen in cawn ding a si. A pakhatnak ah Khrihfa sinak hramthawhnak sacrament hna, a pahnihnak ah damnak sacrament hna le a pathumnak ah zumtu hna pumkhat sinak le thlahnak rian`uan a pe mi sacrament hna ti in kan `hen hna lai. Mah sacrament hna hi mah le ningcang cio tein pumkhat ah an i fonh dih `han bantuk in, an zapi lakah Bawipa thisa hi Sacrament hna i an sacrament in a um i sacrament vialte hna cu Bawipa thisa lei ah an i hawi deh.

Khrihfa sinak sacrament hna cu Tipilnak, Thiang Thlarau peknak le Bawipa Thisa hna hi an si i mah hna hi Khrihfa nunnak a hrampi an si. Khrih vel thawngin Pathian nunnak hrawmnak a si i, mihring nunnak he aa lo. Zumtu hna cu Tipilnak in a thar in hrin an si. Thiang Thlarau peknak in thazaang `hawnter an si i Bawipa thisa ah zungzal nunnak rawl kha an hmuh. Mah Khrihfa sinak sacrament hna thawngin annih nih Pathian nunnak hmuhnak ah an `hang i dawtsiannak tling lei ah an kal.

Mah sacrament cu tipilnak (Baptism) tiah auh a si. Tipilnak cu ti chungah hnim asiloah ti chungah pil ti kha a si. Ti chung i pilnak nih tipil a ingmi kha Khrih a thihnak chungah vui a sinak kha a sawh i ti in a vun chuah `hannak nih Khrih he a thawh`hannak khan “serthar mi in thawhter a sinak kha a sawh. (2Cor 5:17, Gal 6:15, Rom 6:3-4, Col 2:12).

Mah sacrament cu “hrin`hannak in `awlnak le Thiang Thlarau in tharchuahnak” ti zong in auh a si. Zeicahtiah mah nih hin ti le Thlarau in hrin`hannak kha a sawh i a canter taktak i mah lo cun ahohmanh “Pathian pennak chungah luh khawh a si lo.” (Tit 3:5, Jn 3:5).

Mah ti khawlhnak hi ceuternak ti zong in an auh. Zeicatiah, mah cawnpiaknak a hmu mi hna cu an theihthiamnak ah ceunak kha an hmuh. Tipilnak ah Bia kha an cohlan cang caah, mah Bia cu mi vialte kha a ceuter mi ceunak taktak a si. Tipil a ingmi kha ceunak a pek i a mah cu ceunak fa ah a cang. A mah hrimhrim cu ceunak ah a cang (Jn 1:9, 1Th 5:5, Heb 10:32, Eph 5:8).

Tipilnak cu kan nihnih laksawng, vel, chiti thuhnak, ceuternak, thih khawhlonak puan, hrin`hannak ti in khawlhnak tacik le  a sungbikmi laksawng tiah kan auh. Tipilnak cu laksawng tiah kan auh, zeicahtiah mah ngeihm zeihmanh a ngei lo mi hna cungah pekmi a si. Vel tiah kan auh zeicahtiah misual mi hna sin hmanh ah pekmi a si. Chiti thuhnak cu tlangbawi le siangpahrang hna bantuk i chiti thuh mi siter an si caah a si. Ceuter sinak ceunak kha a chuahter caah puan cu kan ningzahnak kha a khuh caah a si. Ti khawlhnak cu ti in a `awl tinak a si i tacik cu a kan kilvengtu le Pathian nih a uk mi kan sinak hmelchunhnak a si. (St.Gregory Nazianzus).

Add new comment

4 + 10 =