Sahrang cu aho dah a si?

Sahrang

SAHRANG PART TWO

Pope cu Khrihfa hna zohkhenhtu Peter changtu pawl an si tiah Catholic bupi nih a ti. Khrihfa dang(Protestants) a cheukhat nih Pope cu sahrang number ngeitu, mithat lainawng a si tiah an ti fawn. Zei sullam dah a si? Biathlam 13:18 chungah kan zoh ahcun, hi ka ah hin fimnak hman a hau.A fimmi paoh nih cun sahrang number cu an tuak khawh ko lai. Zeicah tiah a number cu mi pakhat ca i hmanmi a si. Cu minnumber cu 666 a si tiah kan hmuh.

 A si ah mah Bible cacaang chungah hin mi pakhat ca i hmanmi a si tiah a ti.Pope hi pa zeizah dah an si? A siloah Pope a cangmi kip caah poah ah maw a si ti zong tuahtan a hau rih fawn. Duhsah tein kawl hlai le tuaktan  ahcun William Barclay ṭialmi “THE DAILY BIBLE STUDY” chung i, the Revelation of John Volume 2 chapter 6-22 kan zoh a si ahcun a fiang ngai ko.

A chimmi cu. “666 cu sahraang number a si kan ti. Sihmanhsehlaw 666 cu a dong thiam lo mi number a si. A zei biafang paoh hi number ah an chuak kho dih. A duhmi pa nih A=1, B=2, C=3 tibantuk in Z tiang number a pek khawh. Cu ve bantuk cun A=100, B=101, C=102 tibantukin a pek khawh rih ṭhiamṭhiam. Tahchunhnak ah HITLER min hi kan zoh ahcun H=107, I=108, T=119, L=111, E=104, R=117, a zapi fonh ahcun 666 ah a chuak. Mah bantuk hin cafang kha number pek in tuak tikah min kha 666 ah an chuak kho. Hebrew ca, Latin ca le Mirang ca tibantukin an number pek ning hi aa dang cio.  A tam deuh hn kan zoh a si ahcun 666 a chuakmi hi Pope, John Knox, Martin Luther, Napolean hna min zong hi 666 a chuakmi lawngte an si dih,” a ti.

Pope luchin cung i aa ṭialmi khi ‘VICARIUS CHRISTI’ a si. A sullam cu “Khrih thlahmi” ti a si. Sihmanhsehlaw, 666 a chuakmi number cu “VICARIUS FILII DEI” a si i a sullam cu “Pathian Fapa i thlahmi,” ti a si. Kan vun zoh ahcun V=5,I=1, C=100, A=0, R=0, I=1, U=5, S=0,F=0,I=1, L=50, I=1, I=1, D=500, E=0, I=1. An zapi fohn ahcun 666. Mah hi Latin ca in tuahmi a si. Cun Latin ca ṭhiamṭhiam in pakhat kan vun zoh rih lai. Sunday Adventist Bu a dirhtu (a sertu) HELLEN GOLD WHITE hi vun zoh tuah u si.

H=0, E=0, L=50, L=50, E=0, N=0, G=0, O=5, L=50, D=500, W=10, H=0, I=1, T=0, E=0 a si. A zapi fonh ahcun 666 a chuak. Cun pakhat a um rihmi cu Hebrew ca in kan vun zoh a si ahcun NERO CAESAR hi NRWNQSR tiah ṭial a si. Hebrew holh ah vowel a um lo. N=50, R=200, W=6, N=50, Q=100, S=60, R=200, a zapi fonh ah 666. Biathlam chung chim ning ahcun mah Nero siangpahrang hi 666 si dawh a si tiah William Barclay nih cun a ṭial.

Kan ruah awk hnga ding cu, mah vialte minung min hi 666 an chuak cio ko nain, zeiruang ah dah Pope thengte hi sahrang an ti hnga. Laimi a tam deuh cu kan hmuhtheih a tlawmtuk leng ah an chimmi paoh zumh tlak a si maw si lo ti zong hi tuaktan kan hmang lo i zumh thlawrh in zumh kan hmang. Mah ti kan si ruangah hin pei hlen thiam phungchimtu pawl nih an duhning paoh in an kan hlen lengmang i Khrihfa bu zong kan tam chin lengmangnak le zumhnak khat te i kan um khawh lonak cu a si . Cu a si timi paoh zumh awk a si lo. Zeiruangah dah RC Pope hna hi mahtlukin an huat hna le an thangchiat hna kan ti ahcun a chiakhami Pope zong an rak um taktak men ko lai. A ṭhami le Jesuh Khrih le a Bupi caah a nunnak a pe i mithiang a si mi Pope zong tampi an um. Catholic (RC) Pope hna an zapi in sahrang kan ti hna ahcun Khrih le a Bupi caah nunnak a pe mi Pope hna nih an tuahmi thil liangluang hna, a tutiang i Khrihfa vialte nih kan zulhmi te hna hi tah? Tampi chim awk a um rih.

Zarhte ni ulh ti lo in Zarhpi ni a kan ulh tertu, Vawleicung Nithla Relnak (Calendar) a kan tuah piaktu, Khrihfa vialte nih December 25 ni cu Christmas ni ah a kan hman tertu le Thawhṭhan puai te hna a kan tuah piaktu hi RC Pope lawngte pei an si ko cu. Hi hoi hna hi a ho nih a tuah ti ah dah na ruah? A bik in kan hmanmi Bible ca hi Pope nih “hi vial hi Bible ca si seh” tiah bia a khiah ruang ah Bible zong hi kan ngeihnak a si ti zong hi Khrihfa kip nih kan hngalh awk a hau.

 

 

 

 

 

 

Add new comment

1 + 0 =