A Suimilalm Caan in Thlacamnak

Suimilam caan in Bupi thlacamnak
Zarhpi ni ah kan tuahmi Bawipa Thisa biaknak nih nifate I caan hna kha a hlanh dih I a nun a thlen dih. Cucu a suimilam caan in tuahmi biaknak thlacamnak thawng in a si. Hi ti in tuahsernak cu Lamkaltu hna nih “thlacam zungzal uh” timi forhfialnak bia cungah zumh tlakin nunnak a si. Cucu chunzan hlan in Pathian thangtthatnak nih thianter seh tinak caah a si. 1Thess 5:17, Eph 6:18. Mah Bupi thlacamnak hi zumtu vialte hna nih tipil a ingmi hna tlangbawi sinak kha an hman. Bupi nih a fehtermi thlacamnak kha vun cam tikah a suimilam caan in biaknak cu lengnu nih a valpa sinah bia a chimmi aw tinak a si. Mah hi Khrih hrim hrim nih a pum he hmunkhat tein Pa sinah a chimmi thlacamnak a si. Bupi thlacamnak biaknak cu Pathian miphun dihlak i thlacamnak si awk caah timh a si.
Hi chungah Khrih hrimhrim nih a Bupi thawngin tlangbawi rian kha a peh.Member hna nih Bupi chung I an dirhmun cio le an nunnak ning cio in an I tel. Siangbawi hna cu tukhal rian ah aa pe mi an si bangin thlacamnak le Pathian bia chimnak ah teima in aa zuam ding ah auh an si. Biaknak le Bupi caah ah pumpeknun in a ummi Brother le Sister hna nih an mah le auhnak ning cio in pumpe mi an si bang in zumtu vialte hna caah an si khawh chungin thla an cam lai. Thlarau zohkhenhtu hna nih mah caan hi a bik in zanlei thlacamnak hi biakinn chungah Zarhpi ni le Puai ngan ni ah tuah khawh awkah an zoh lai. Khrihfa hna zong mah thlacamnak hi siangbawi hna he, a siloah anmah lawngin , a siloah pakhat te zongin cam awkah thepek an si.
A suimilam caan biaknak tuahnak nih lungkhat te le ruangte o cam lawng kha a duhmi a si lo. Biaknak kong le Bible kong, a bik in Psalm hla kong hi theithiam hna she ti a duh.
Bupi thlacam biaknak i hmanmi hla le litani hna nih Psalm thalcamnak kha Bupi chan chungah a kenkip in a luhpi I nikhat chungin a caan nih a vun sawhmi ngiatnak hna, biaknak khuacaan le tuahmi puai hna nih an sawh mi hmelchunh ngiatnak hna kha a chim. Cu lengah mah le caan te ah relmi Pathian Bia ( a lehnak tawite he) le thlarau nunnak kong a ttialtu hna an cattailmi relnak nih tuah lio mi thlarau biathuk kha thuk deuh ngai in a phuan I Psalm hla theihthiamnak ah a bawmh I daite in thlacamnak caah a timhtuah. Pathian Bia vun rel in dai tein ruahnak cu thlacamnak ah a cang I biaknak tuahnak hrampi ah a cang. Bupi thlacam biaknak cu Bawipa Thisa raithawinak vun samhmi a si I Pathian miphun hna I duhpatnak (devotion) a phunphun lei ah a aumi lam ah a cang. A bik in Bawipa Thisa Biaknak ah.