Zei thil poah hi Pathian Khuakhaannak chungah an um dih

Pathian nih a khuakhaannak kha a tuah

Sermi thil hna nih mah le tthatnak le tlinnak kha an ngei cio. Cucu sertu kut in tling cia in a ra mi an si lo. An i tinhmi an phanhnak hnga Pathian nih a hruai hna i a bawmh hna. Cucu Pathian zohkhenhnak kan ti mi cu a si.

Pathian zohkhenhnak kong hi Bible nih fiangtein a chim. Pathian nih zeizong vialte kha a zohkhenh dih, a hembik thil hna in van le vawlei tuanbia ah a cangmi thil nganngan hna tiang a zohkhenh hna. Ca Thiang nih thil a cangmi hna cungah Pahian nih a uk cikcek nak kong kha hmual ngei ngai in a chim. “Kan Pathian cu van hna cungah a um: a duhmi paoh kha a tuah khawh”(Ps 115:3). Khrih zong cu bantuk cun a si ve. A hun i a ho hmanh nih an khar lai lo... a khar i a ho hmanh nih an hung lai lo (Bia 3:7)

Phungthluk bia nih a chim bang in a si ko. “Minung lungthin chungah khuakhaannak a tampi ko lai, sihmanhsehlaw Pathian tinhmi lawng a hmun lai”. (Phung 19:21). Jesuh nih ngakchia bantuk in Pathian zohkhenhnak cungah i bochan kha a duh. “Cucaah, zeidah ka ei lai, a siloah zeidah ka din lai? tiin nan lungre thei hlah u, vancung i a ummi nan pa nih nan herhmi vialte kha a hngalh ko. Sihmanhsehlaw a pennak le a dinnak kha kawl hmasa u law hi thil vialte zong nanmah ta an si dih lai” a ti. (Mt 6:31-33)’

Pathian cu a khuakhaannak vialte a uk dihtu Bawibik a si. Sihmanhsehlaw a khuakhaannak kha tuah awkah a sermi hna i bawmhnak kha a hman. Mah a hmannak cu a derthawm, a santlaihlo ruang ah a si lo, a lianhngannak le a tthatnak ruangah a si. Zeicahtiah Pathian nih a sermi hna kha umnak lawng a pe hna lo, anmah tein thil tuahin hmaihngalnak kha a pek hna. An sining cio in si hna seh ti a duh hna. Cuticun a khuakhaan tlinnak ah aa bawmhter hna.

Pathian nih mah zohkhenhnak nawl kha minung sin ah a pek i vawlei kha tei awk le sermi thil vialte uknak nawl kha a pek (Gen 1:26-28). Cuticun Pathian nih minung kha fimnak le sernak rian kha tlinter awk ah le anmah le an minung hawi tthathnemnak caah rianttuan awkah ttuanvo a pek hna. Pathian duhnak in rian a ttuan mi kan si ti kha hngalh lem loin Pathian khuakhaannak chungah khan an rian ttuannak, an thlacamnak le an sifah harsatnak he khan an lut cio ko (Col 1:24). Cutikah an nih cu, “Pathianrianttuan hawi”, a pennak caah rianttuantu ah an cang dih(1Cor 3:9).  

Pathian cu a sermi hna an rianttuannak vialte chungah rian a ttuan ko, timi biatak hi Sertu Pathian cung zumhnak he tthen khawh a si lo. “Pathian a lung tlinnak kha nan duhnak hnga le nan tuahnak hnga caah Pathian cu nan chungah rian a ttuan k” (Phil 2:13). Mah hna nih hin minung hmaihngalnak (Mithmai tthatnak) kha a zorter lo i a tthanter lehlam.

Zeihmanhlo chungin Pathian tthawnnak, fimnak le tthatnak in a rak chuakmi a si bangin a thawhkehnak Pathian he a hram chah a si ahcun zeihmanh a tuah ko lo, zeitintiah “ Sertu lo cun sermi cu a lotlau ko”. Pathian vel bawmhnak le, cun hmanungbik a tinhnak kha a phan kho lo.(Mt 19:26, Jn 15:5,14:13)