Bawinu Mary Chuahni

September, 8
BAWINU CHUAH NI (THE NATIVITY OF MARY)
Nungak thiang Bawinu Mary cu Bawi Jesuh Khrih a hrinhlan kum 16 aa duh ah Galilee ram Nazareth khua i a ummi St. Joachim le St. Anna nih an rak hrin. Joachim le Anna cu (kum upa) an tar tiang fanu fapa an ngeih lo caah Pathian nih fanu fapa a kan pe ti lai lo tiah an i ruah. Asinain Pathian nih an thlacam nak kha a theihpiak hna i khamhtu Messiah i a nu a si hngami Bawinu Mary kha fanu laksawng a rak zaangfah hna.
Bawinu Mary chuah ni puai kha Jerusalem khua ah an rak tuah hmasa . AD 687 kum ah Pope Sergius chan lio vawleicung ah a rak karh. Bawinu Mary chuah ni puai cu December 8 ni tuahmi sualhram ngeilo in pawimi nu puai he thla 9 bak a hlat caah pehtlaihnak a ngei. Sualhram ngei loin pawimi Bawinu i fale tiah Sister le Brother phu hna nih an dawtnak kha Bawinu sinah an pekchanh dihnak langhternak caah hi puai ni theng te ah hin biaknak lei biakamnak an tuah.