Bawlungchuih lentecelhnak in Siangbawi pakhat a hung si mi Chase Hilgenbrinck

Bawlungchuih lentecelhnak in Siangbawi pakhat a hung si mi Chase Hilgenbrinck

Chase Hilgenbrinck cu American ram Illinois peng Quincy khua ah Apri 2, 1982 kum ah a rak chuak mi a si. Unau pahnih an um i an u nau pahnih in an rak ngakchiat lio tein an nu le a pa hna nih zarhpi ni paoh ah biakinn an rak pumhpi lengmang mi hna an rak si. Hi u nau pahnih hna zong hi an rak ngakchiat lio hrimhrim in Mass raithawinak caan paoh ah (Mass server) a rak bawmtu an rak si fawn.

Hi pa hi a rak ngakchiat lio hrimhrim in lentecelh hi a rak zuam ngai mi a si bantukin sianginn a rak kai nak zongah hin lentecelh nak lei in laksawng a rak hmu lengmang mi a rak si fawn. 2004 kum ah university a rak dih i Chile ram um club pakhat he riantuan ti dingin hnatlak nak an rak ngei i cu ram ah lente aa rak i celh mi a rak si. Chile ram ah kum 4  bawlung a rak chuih hnu ah US ram ah a rak kir tthan i an ram um Colorado Rapids timi club ah a rak chuih tthan. A rauh hlan ah New England Revolution club nih an auh tthan i cu ka ah cun aa rak i thial.

Chase Hilgenbrinck a hnu bik bawlung a rak chuih cu July 13, 2008 kum Maxican club he an rak chuih hi a rak si. Hnu kham (Back side) dirhmun in lente aa rak i celh mi, a min thang ngai mi le hmai lei lentecelh aa dinh hnu zongah tha dam tein a um kho tu a si ko nain a lung aa thleng i bawlungchuih dirhmun in Siangbawi pakhat siding tu kha aa rak i thim.

Chase nih siangbawi pakhat si a duhnak kong kha a dang siangbawi pakhat sinah a chimh tikah cu siangbawi pa nih cun biahalnak tampi a rak tuah tiah an ti. Cu biahal nak konglam a rak leh mi si hna seh, amah konglam a chim mi siseh ca in a rak ttial tikah cahmai 20 leng a si. Nikhat chungah biahal mi ca in siseh, bialehnak in siseh panga (5) a rak tuah i a chimmi bia lei in siseh, a ttial mi capar lei in siseh Psychologist pathum nih ttha tein an chek dih hnu lawngah a lungduh mi kha an rak leh.

 “Zeiruangah dah mah tluk a nuam mi bawlung chuih lentecelhnak na kal tak” tiin a hawi pakhat nih a rak hal tikah a leh mi cu, “Pathian nih a ka pek mi vel ka hrawh a si lo. Phundang in a ka pek mi vel hmanter than a ka duh caah a si. A tu lio seminary bawlung chuihnak zongah hin ka chuih ve ko, hruaitu pakhat zong ka si . Bawlung chuihnak kong he pehtlai in ka hmuh ning zong aa dang cang. Keimah hrimhrim zong ka thinlung kaa thleng cang. Hi bantuk thlennak zong hi ka nunnak ah ka herh hrimhrim mi a si ti zong Bawipa nih a theih cia mi a si ko. Catholic Siangbawi pakhat ka si cu kaa lawm tuk hringhran” ti zongin Chase nih a chim.

Chase Hilgenbrinck cu May 24, 2014 ni ah Siangbawi cannak ordination a hmu mi a si i amah cu Diocesan siangbawi pakhat a si.